މިހާރު ފެނާއި ނަރުދަމާގެ ނިޒާމު ގާއިމް ކުރުމުގެ މަސައްކަތް ކުރިއަށްދާ ހުރިހާ ރަށެއްގެ މަޝްރޫއުތައް މި އަހަރުގެ ނިޔަލަށް ނިންމާލެވޭނެ ކަމަށް މޯލްޑިވްސް ވޯޓާރ އެންޑް ސުވަރޭޖް (އެމްޑަބްލިއުއެސްސީ) ގެ މެނޭޖިން ޑިރެކްޓަރ އަބްދުލް މަތީން މުހައްމަދު ވިދާޅުވެއްޖެއެވެ.

ދައުލަތުގެ މީޑިއާއިން ގެނެސްދޭ ޕްރޮގްރާމެއްގައި ވާހަކަ ދައްކަވަމުން މަތީން ވިދާޅުވީ މި އަހަރުގެ ތެރޭގައި 20 ރަށުގައި ފެނާއި ނަރުދަމާ ގާއިމުކުރުމުގެ މަސައްކަތް ފެށުމަށް ތައްޔާރުވެފައިވާ ކަމަށެވެ.

މަތީން ވިދާޅުވީ އޭގެ ތެރެއިން ބައެއް މަޝްރޫއުތަކުގެ އަމަލީ މަސައްކަތް މިހާރު ފަށާފައިވާ ކަމަށެވެ. އަދި ބައެއް މަޝްރޫއުތައް ޑިޒައިން ފޭސްގައި ހުރި ކަމަށްވެސް މަތީން ވިދާޅުވިއެވެ.

މަތީން ވިދާޅުވީ އެމްޑަބްލިއުއެސްސީގެ އަމާޒަކީ މިހާރު މަސައްކަތް ފަށާފައިވާ މަޝްރޫއުތައް މި އަހަރުގެ ނިޔަލަށް ނިންމާލުން ކަމަށެވެ. އަދި ޑިޒައިން ފޭސްގައި ހުރި ހުރިހާ މަޝްރޫއުތައްވެސް އަންނަ އަހަރުގެ މެދުތެރޭ ނިމޭނެކަމަށް މަތީން ހާމަކުރެއްވިއެވެ.

މީގެ އިތުރުން މަތީން ވިދާޅުވީ ހަރަދު ކުޑަ ކުރުމުގެ ގޮތުން ސަރުކާރުން ކަނޑައަޅުއްވާފައިވަނީ ކޮމާރޝަލް ކޮންޓްރެކްޓާއަކާ ހަވާލުނުކޮށް، ސަރުކާރު ކުންފުނިތަކުން މި މަސައްކަތްތައް ކުރިއަށްގެންދާ ގޮތަށް ކަމަށެވެ. އަދި މިއީ އެންމެ ހަރަދު ކުޑަ ގޮތް ކަމަށްވެސް އޭނާ ވަނީ ފާހަގަކުރައްވާފައެވެ،

ސަރުކާރު ވެރިކަމާ ހަވާލުވިއިރު ފެނާއި ނަރުދަމާގެ ވަރަށް ގިނަ މަޝްރޫއުތަކެއް ވަނީ ހުއްޓިފައެވެ. އެހެންނަމަވެސް އޭގެ ތެރެއިން ގިނަ މަޝްރޫޢުތަކެއް މިދިޔަ އަހަރު ވަނީ ނިންމާފައެވެ. އަދި ހުއްޓިފައިވާ 22 ރަށުގެ މަސައްކަތް މިދިޔަ އަހަރުގެ ފަހުކޮޅު އެމްޑަބްލިޔުއެސްސީއާ ވަނީ ހަވާލުކޮށްފައެވެ.