ދިވެހިރާއްޖެއަށް މިހާރު 44 އެއާލައިކުން ދަތުރުކުރާކަމަށް ފަތުރުވެރިކަމާ ބެހޭ ވުޒާރާއިން ބުނެފިއެވެ.

ފަތުރުވެރިކަމާ ބެހޭ ވުޒާރާއިން އާންމުކުރި މޯލްޑިވްސް ޓޫރިޒަމް އަޕްޑޭޓްގައިވާ ގޮތުން އޭޝިއާ އާއި މެދުއިރުމަތީގެ އިތުރުން ޔޫރަޕްގެ ގައުމުތަކުންވެސް ދިވެހިރާއްޖެއަށް މިހާރު ދަތުރުކުރެ އެވެ.

އެ ވުޒާރާއިން ހާމަކުރި ގޮތުގައި މިމަހުގެ ދެވަނަ ދުވަހުގެ ނިޔަލަށް 647،677 ފަތުރުވެރިން ރާއްޖެ ޒިޔާރަތްކޮށްފައިވެ އެވެ. އަދި މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި ފަތުރުވެރިންނަށްވުރެ 5.2 އިންސައްތަ އިތުރު އަދަދެއްކަން ފާހަގަ ކުރެވެއެވެ.

މިއަހަރުގެ މިހާތަނަށް އެންމެ ގިނައިން ފަތުރުވެރިން ރާއްޖެއަށް ޒިޔާރަތް ކޮށްފައި ވަނީ ޗައިނާއިންނެވެ. އެގޮތުން އެ ގައުމުން ރާއްޖެއަށް 75،135 ފަތުރުވެރިން ޒިޔާރަތް ކޮށްފައިވެއެވެ. އަދި ދެވަނައިގާ އޮތް ރަޝިއާ އިން 68،375 ފަތުރުވެރިން ޒިޔާރަތް ކޮށްފައިވާއިރު ތިންވަނައިގައި އޮތް އިނގިރޭސިވިލާތުން 67،447 ފަތުރުވެރިން އަދި ހަތަރުވަނައިގައި އޮތް އިޓަލީން ރާއްޖެއަށް 58،722 ފަތުރުވެރިން ވަނީ ޒިޔާރަތް ކޮށްފައެވެ.

ރާއްޖެއަށް ޒިޔާރަތްކުރި ފަތުރުވެރިންގެ ތެރެއިން 69.4 އިންސައްތަ، ނުވަތަ 449،382 ފަތުރުވެރިން ޗުއްޓީ ހޭދަކުރީ ރިސޯޓްތަކުގަ އެވެ. ގެސްޓްހައުސްތަކުގައި ޗުއްޓީ ހޭދަކުރީ 25.2 އިންސައްތަ، ނުވަތަ 162،928 ފަތުރުވެރިންނެވެ. ހޮޓާތަކުގައި 18،879 ފަތުރުވެރިން އަދި ސަފާރީ އުޅަނދުތަކުގައި 16،041 ފަތުރުވެރިން ޗުއްޓީ ހޭދަކުރި އެވެ.