މާލެ ސަރަހައްދުގެ މަގުމަތީގައި ގިނަވެފައިވާ ބުޅާތައް ލަސްނުކޮށް ބިލަކަށް ޚާއްސަކޮށްފައިވާ އޮޅުހިޔަލަށް ގެންދިއުމަށް މާލޭގެ މޭޔަރު އާދަމް އާޒިމް އަނެއްކާވެސް އިލްތިމާސްކުރައްވައިފިއެވެ.

އެކްސްގައި ހިއްސާކުރެއްވި ޕޯސްޓެއްގައި މޭޔަރު ވިދާޅުވީ މަގުމަތީގައި އުޅޭ ބުޅާތައް ލުމަށް މާލެ ސިޓީ ކައުންސިލުން ހަދައި ނިންމާފައިވާ ތަނަށް މާލެ ސަރަހައްދުގެ މަގުތަކުގައި ގިނަވެފައިވާ ބުޅާތައް ވީހާވެސް އަވަހަށް ގެންގޮސްދިނުން އެދި އެނިމަލް ވެލްފެއާ މިނިސްޓްރީއަށް ދަންނަވާ ކަމަށެވެ.

މޭޔަރު އާޒިމް ވިދާޅުވީ ބުޅަލުގެ ނަޖިހުގެ ޝަކުވާތައް ކައުންސިލަށް އިންތިހާއަށް ލިބެމުންދާ ކަމަށެވެ. އަދި ރައްޔިތުން ބުޅަލުގެ ނަޖިހުން ސަލާމަތް ކުރަން ޖެހޭ ކަމަށްވެސް މޭޔަރު ވިދާޅުވިއެވެ.

އަދި މިކަމާ އަޅާ ނުލައި ތިބުމަކީ ބޮޑު އިހުމާލެއް ކަމަށް މޭޔަރު ފާހަގަކުރެއްވިއެވެ.

Animal Welfare Miniatry ah dhannavaalal, magumathee ulhey bulhaathah lumah Male' City Council in hadhaa ninmaafavaa thanah Male’ city ( Male, Villimale’, Hulhumale’) ga ginavefaavaa bulhaathah veehaaves avahakah gengosdhinun edhen. Bulhaluge najihuge shakuvaa inthihaa ah… pic.twitter.com/GTvvm778Ix

— Mayor of Male’ City - Adam Azim (@adamazim) April 22, 2025

އޮޅުހިޔާ ހުޅުވީ މިދިޔަ ނޮވެންބަރު މަހު އެވެ. އަދި މާލޭގެ އެކި ސަރަހައްދުތަކުގައި ދިރިއުޅޭ ބުޅާތައް އެ ފެސިލިޓީއަށް ބަދަލުކުރަން މިދިޔަ ޑިސެންބަރު މަހު މާލޭ ސިޓީ ކައުންސިލުން މަސައްކަތްކުރި އެވެ.

އެހެންނަމަވެސް ބުޅާތައް ފެސިލިޓީއަށް ގެންދަން ފެށީ ފެބްރުއަރީ މަހުއެވެ.

ފެސިލިޓީ ހުޅުވައި ބުޅާތައް ގެންދަން ފެށިނަމަވެސް، އަދިވެސް މާލޭގެ މަގުތަކުގައި ގިނަ އަދަދަކަށް ބުޅާތައް އުޅޭތީ ވަރަށް ގިނަ މީހުން ދަނީ ކަންބޮޑުވުން ފާޅުކުރަމުންނެވެ.

އޮޅުހިޔަލުގައި ބުޅާތައް ކަރަންޓީނު ކުރާނެ ސަރަހައްދަކާއި ކްލިނިކަކާއި ލެބޯޓްރީއެއްގެ އިތުރުން ބުޅާތަކަށް ދޭންޖެހޭ ބޭސް ހުންނަ ފާމަސީއަކާއި އެ ބުޅާތައް އުޅޭނެ ސަރަހައްދެއްވެސް ހަދާފައިވެއެވެ.