ޖުމްހޫރީ ޕާޓީގެ ލީޑަރު އަދި ވިލާ ކުންފުނީގެ ޗެއާމަން ގާސިމް އިބްރާހިމް ރޭ ހަތަރު ވަނަ ކައިވެންޏެއް ބައްލަވައިގަނެ ޒުވާން ކަނބަލަކާއެކު ލޯބީގެ އައު ހަޔާތެއް ފަށްޓަވައިފިއެވެ.

ރާއްޖޭގެ މަޝްހޫރު ވިޔަފާރިވެރިޔާ އަދި މާމިގިލީ ދާއިރަގެ މެމްބަރު ޤާސިމް އިބްރާހިމް ޒުވާން އަންހެން ކަނބަލަކާއި ކައިވެނި ބައްލަވައިގެންފައިވަނީ އެންމެ ފަހުން ކައިވެނި ބައްލަވައިގެންނެވި އައިޝަތު ނަހުލާ ވަރި ކުރަށްވާފައި ކަމަށް ދެކެވޭ ވާހަކަތަކަކީ އެއްވެސް ހަގީގަތެއް ނެތް ދޮގު ވާހަކަތަކެއްކަމަށް މިނޫހަށް ވަނީ ކަށަވަރު ވެފައެވެ. ޤާސިމް 4 ވަނަ ކައިވެނީގެ ހަފުލާ ބާއްވަވާފައިވަނީ ރޭގައެވެ.



ޤާސިމް އިބްރާހީމްއާއި 4 ވަނަ އަނބިކަނބަލުން ރޭގެ ކައިވެނީގެ ހަފުލާގައި (ރަސް ފޮޓޯ)

ގާސިމާއި އެންމެ ފަހުން ކައިވެނި ބައްލަވައިގެންނެވި މިހާރުގެ ޓްރާންސްޕޯރޓް މިނިސްޓަރު ނަހުލާގެ ކައިވެންޏަށް މިހާރު 13 އަހަރު ވެފައިވާއިރު، ދެކަނބަލުންނަށް ވަނީ ހަބޭފުޅަކު ލިބިވަޑައިގެންފައެވެ. ޤާސިމް ވަނީ ސިޔާސީ ގޮތުން ބޭއްވި އެކި ހަފްލާތަކުގައިވެސް އޭނާގެ ހަޔާތުގެ ބައިވެރިޔާ ނަހުލާއާއި ގުޅޭގޮތުން ތައުރީފުގެ ބަސްތައް އޮއްސަވާލައްވާފައެވެ. އެގޮތުން ގާސިމް ވިދާޅުވެފައިވަނީ އައިޝާއާ ދުވަހަކު ވެސް ވަކި ނުވާނެ ކަމަށެވެ. އަދި ވިދާޅުވީ އައިޝާ އާއި އެމަނިކުފާނާ ދޭތެރޭގައި އޮތީ "އިލާހީ ގުޅުމެއް" ކަމަށެވެ.



ޤާސިމް އިބްރާހިމާއި 4 ވަނަ އަނބިކަނބަލުން (ރަސް ފޮޓޯ)

ގާސިމް ރޭގައި ކައިވެނި ބައްލަވައި ގެންފައިވަނީ ވަރަށް ޒުވާން ކަނބަލަކާއެވެ. މާމިގިއްޔާއި އުކުޅަހަށް ވެސް ނިސްބަތްވާ މި ޒުވާނާގެ އުމުރަނީ 20 އަހަރު ކަމަށް މައުލޫމާތު ލިބެއެވެ. ގާސިމްގެ އުމުރުފުޅުން މިހާރު 70 އަހަރެވެ.



ޤާސިމް އިބްރާހިމާއި އާ އަނބިކަނބަލުން (ރަސް ފޮޓޯ)

ގިނަ ބަޔަކު ގަބޫލުކޮށްގެން ތިބީ ނަހުލާއަށްފަހު އިތުރު ކައިވެންޏެއް ދެން ޤާސިމު ބައްލަވައި ނުގަންނަވާނެ ކަމަށެވެ. ނޫނީ ދެން އިތުރު ކައިވެންޏަށް ބައްލަވައި ގަންނަވަން ކެރިވަޑައި ނުގަންނަވާނެ ކަމަށެވެ. ނަމަވެސް ރޭ ވަރަށް ޒުވާން ކަނބަލަކާ ކައިވެނި ބައްލަވައިގެން ޤާސިމް ވަނީ އެމަނިކުފާނުގެ ހިތްޕުޅުގެ ޒުވާންކަން ސާބިތުކޮށްދެއްވާފައެވެ.