ދައުލަތުގެ ކުންފުނިތަކުގެ ކަންކަން ބެލެހެއްޓުމަށް އުފައްދާފައިވާ ޕްރައިވެޓައިޒޭޝަން އެންޑް ކޯޕަރެޓައިޒޭޝަން ބޯޑުގެ ރައީސް މަޤާމުން އިސްތިއުފާދެއްވީ ފިނޭންސް މިނިސްޓަރ އިބްރާހީމް އަމީރުގެ ނުފޫޒާހުރެ ކަމުގައި ރައްޔިތުން މަޖިލިހުގެ ނައިފަރު ދާއިރާގެ މެންބަރު އަދި ޕީޕީއެމްގެ ނައިބުރައީސް އަޙްމަދު ޝިޔާމް މިއަދު ވިދާޅުވެއްޖެއެވެ.

ޕްރައިވަޓައިޒޭޝަން ބޯޑުގެ ރައީސްގެ މަޤާމުގައި ހުންނެވި ޙަސަން ވަޙީދު އެ މަޤާމުން މިއަދު ވަނީ އިސްތިއުފާދެއްވާފައެވެ. އޭނާ އެ މަޤާމުން އިސްތިއުފާދެއްވި ސަބަބެއް ހާމައެއް ނުކުރައްވައެވެ. އެހެން ނަމަވެސް އޭނާ މަގާމުން އިސްތިއުފާ ދެއްވީ ޕްރައިވަޓައިޒޭޝަން ބޯޑުގެ މަސައްކަތްތައް އެކަށީގެންވާ ގޮތެއްގައި ކުރިއަށް ނުދާ ކަމަށް ތުހުމަތުކޮށް އެ ބޯޑާ ގުޅޭ މައްސަލައެއް، ރައްޔިތުންގެ މަޖިލިހުގެ މާފަންނު މެދު ދާއިރާ މެންބަރު އިބްރާހީމް ރަޝީދު (ބޮންޑެ) މަޖިލީހަށް ހުށައަޅުއްވާފައި ވަނިކޮށެވެ. 

ޙަސަން ވަޙީދު މަޤާމުން އިސްތިއުފާދެއްވުމާ ގުޅިގެން އަހުމަދު ޝިޔާމު ކުރެއްވި ޓުވީޓެއްގައި ވިދާޅުވީ، ދައުލަތުގެ ކުންފުނިތަކުގެ ބެލެނިވެރި ފަރާތްކަމުގައިވާ ޕްރައިވެޓައިޒޭޝަން އެންޑް ކޯޕަރެޓައިޒޭޝަން ބޯޑު (ޕީސީބީ)ގެ އެމްޑީގެ މަޤާމަށް ބޭފުޅަކު ޢައްޔަންކުރެއްވިތާ ކުޑަ ދުވަސްކޮޅެއްގެ ތެރޭގައި، އެބޭފުޅާ މަޤާމު ދޫކުރަށްވައި އިސްތިއުފާދެއްވި ސަބަބު އެނގެން ޖެހޭ ކަމަށެވެ. ޝިޔާމު ވިދާޅުވީ އެ ބޯޑަށް ފިނޭންސް މިނިސްޓަރު އިބްރާހީމް އަމީރު ވަރަށް ބޮޑަށް ނުފޫޒު ފޯރުއްވާ ކަމުގެ އަޑުތައް އިވިވަޑައިގަންނަވާ ކަމަށެވެ.

ޝިޔާމު މިހެން ވިދާޅުވެފައިވާއިރު، ޕްރައިވަޓައިޒޭޝަން ބޯޑާ ގުޅިގެން ބޮންޑެ ހުށަހެޅުއްވި މައްސަލާގައި އެ ބޯޑުން ކުރަންޖެހޭ ވަރަށް ގިނަ ކަންކަން ކޮށްފައިނުވާ ކަން ވަނީ ފާހަގަކުރައްވާފައެވެ. އަދި ކުންފުނިތަކުން މަސައްކަތްކުރަމުންދަނީ ޤާނޫނާ އެއްގޮތަށްތޯ ބެލުމުގައި އެ ބޯޑު އިހުމާލުވެފައިވާ ކަމަށްވެސް ބޮންޑެ ހުށައެޅުއްވި މައްސަލައިގައި ބުނެފައިވެއެވެ.