ސަރުކާރުން ޖަހަނީ އަދުރޭގެ ހިސާބު ކަމަށާއި މިހާރުގެ ސަރުކާރުން މުޅި ގައުމު ސުންނާފަތިކޮށް، ރައްޔިތުން ނިކަމެތިކޮށް ފަގީރުކޮށްފި ކަމަށް ވިދާޅުވެ، ޕީޕަލްސް ނޭޝަނަލް ފްރަންޓް (ޕީއެންއެފް) ގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި މަލީހު ވިދާޅުވީ، ރައީސް ޑރ. މުހައްމަދު މުއިއްޒުގެ ސަރުކާރުން "ރަސްމާލެ" މަޝްރޫއުގެ ނަމުގައި ހިންގަމުންދަނީ ބޮޑު ޖަރީމާއެއް ކަމަށާއި، އެ ވައްކަން ބަލަން ޖެހޭނެ ކަމަށެވެ. ގައުމުގެ މަގާމެއް ރައްޔިތުން މީހަކާ ހަވާލުކުރުމަކީ ގައުމު ލޫޓުވަން އެ މީހަކަށް ލިބޭ ލައިސަންސެއް ނޫން ކަމަށް ފާހަގަކުރައްވަމުން، މަލީހު ވަނީ މި ސަރުކާރުގެ ސިޔާސަތުތަކުގެ ސަބަބުން ރައްޔިތުންނަށް އިންތިހާއަށް ދަތިވެފައިވާ ކަމަށް ވިދާޅުވެފައެވެ.

އިގްތިސާދީ ހާލަތަށް އަލިއަޅުއްވާލައްވަމުން މަލީހު ވިދާޅުވީ، ޑޮލަރުގެ އަގު މަތިނުވާނެ ކަމަށް ރައީސް މުއިއްޒު ވިދާޅުވި ނަމަވެސް، މިހާރު ކަޅު ބާޒާރުގައި ޑޮލަރުގެ އަގު 20.25 ރުފިޔާއަށް އަރާފައިވާ ކަމަށެވެ. އަދި ޑޮލަރުގެ ތާށިކަން ހައްލުކުރުމަށް ފެށި ބަންކަރިން ޕްރޮޖެކްޓުން ލިބޭނެ ކަމަށް ބުނި 400 މިލިއަން ޑޮލަރަށް ވީގޮތަކާ މެދު ވެސް އޭނާ ސުވާލު އުފެއްދެވިއެވެ. މިކަމާ ގުޅިގެން މަޖާޒީ ގޮތަކަށް އޭނާ ވިދާޅުވީ، ރައީސް ޖައްސަވަނީ "އަދުރޭގެ ހިސާބު" ކަމަށާއި، އެ ބުނާ ފައިސާ ދިޔައީ ދިމްޔާތުގެ 12 ވަނަ ފަންގިފިލާއަށްތޯ ސުވާލު އުފެދޭ ކަމަށެވެ.

މަލީހުގެ ޕޯސްޓު ނިންމަވާލައްވާފައިވަނީ މި ސަރުކާރަކީ "ޖޯކަރުންގެ ސަރުކާރެއް" ގޮތުގައި ސިފަކުރައްވަމުންނެވެ. މަލީހުގެ އިތުރުން، އާންމު ރައްޔިތުންގެ ތެރެއިން ގިނަ ބަޔަކު ވެސް ގެންދަނީ ސަރުކާރުގެ މަތިފަޑީގައި ތިއްބެވީ ގާބިލުކަމެއް ނެތް، ހަމައެކަނި ވާހަކަ ދެއްކުމަށް އިސްކަންދޭ ބައެއްގެ ގޮތުގައި ސިފަކޮށް ކަންބޮޑުވުން ފާޅުކުރަމުންނެވެ.