ގްރޭޓާ މާލެ ކަނެކްޓިވިޓީ ބްރިޖް ނުވަތަ ތިލަމާލެ ބްރިޖްގެ މަޝްރޫޢަކީ ދިވެހި ރައްޔިތުންގެ އުންމީދުތަކާ ގުޅިފައިވާ ބިޔަ މަޝްރޫޢަކަށް ވީނަމަވެސް، މި ސަރުކާރުގެ ދޯދިޔާ ރޭވުންތަކުގެ ސަބަބުން މި މަޝްރޫޢު ވަނީ ނިމުމެއް ނެތް އިންތިޒާރަކަށް ވެފައެވެ. ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތޮލިބު އެންމެ ފަހުން ދެއްވި ތަފްސީލުތަކުން ހާމަވަނީ، ސަރުކާރުން ކުރިން ރައްޔިތުންނަށް ދެއްކި ތާރީޚުތަކަކީ އެއްވެސް އަސާސެއް ނެތް، ހަމައެކަނި ސިޔާސީ މަންފާއަށް ދެއްކި ވާހަކަތަކެއް ކަމެވެ.

މިނިސްޓަރު މުއްތޮލިބު 2023 ވަނަ އަހަރު ވިދާޅުވި ތާރީޚުތަކާއި، މިހާރު މިވިދާލުވަމުން އަންނަ ތާރީޚުތަކާ ދެމެދު އަހަރަކަށް ވުރެ ގިނަ ދުވަހުގެ މުއްދަތުގެ ފަރަގު ހުރުމަކީ ސަރުކާރުގެ ނާޤާބިލުކަމަށް ހެކިދޭ ކަމެކެވެ.

މަޝްރޫޢުގެ ދުވެލި މަޑުޖެހިފައިވާކަން އަމިއްލައަށް އިޢުތިރާފުވަމުން، ކޮންޓްރެކްޓަރަށް ދަތިތަކެއް ހުރި ކަމަށް ވިދާޅުވެ ސަރުކާރުން ބެލްޓް އަޅުވަނީ ކުރީގެ ސަބަބުތަކުގައެވެ. މާލެއިން ވިލިމާލެއަށް ގުޅާލުމުގެ މަސައްކަތް 2025 އަށް ނިންމާނެ ކަމަށް ބުނެފައި އޮތް އޮތުން، މިހާރު 2026 އަށް ދިގުލައިގެން ދިއުމަކީ ގުޅިފަޅާއި ތިލަފުށިން ބޯހިޔާވަހިކަމާއި ވިޔަފާރީގެ ފުރުސަތުތައް އުންމީދުކޮށްގެން ތިބި ރައްޔިތުންގެ މޫނުމަތީގައި ތަފާލެއް ޖެހުން ފަދަ ކަމެކެވެ. މަސައްކަތް އަވަސްކުރަން އިންޑިއާ ސަރުކާރާ ވާހަކަދައްކާ ކަމަށް ބުނެ، ހަގީގީ މަސައްކަތުގެ ބަދަލުގައި ސަރުކާރުން އަދިވެސް އުޅެނީ "ވާހަކަ ދެއްކުމުގެ" މަރުހަލާގައެވެ.

އެންމެ ކަންބޮޑުވާންޖެހޭ ކަމަކީ، މަޝްރޫޢު އެއްކޮށް ނިންމާލެވޭނެ ކަމަށް ކުރިން ބުނި 2026 ވަނަ އަހަރުގެ ބަދަލުގައި، މިހާރު އެ ތާރީޚު 2027 އަށް ބަދަލުވެފައި އޮތުމެވެ.

މިއީ ސަރުކާރުގެ އިޚުލާސްތެރިކަމެއް ނެތްކަމާއި، މިފަދަ ބޮޑެތި އުމްރާނީ މަޝްރޫޢުތައް މެނޭޖްކުރުމުގެ ފަންނީ ޤާބިލުކަން މި ވުޒާރާގައި ނެތްކަން ހާމަކޮށްދޭ ކަމެކެވެ. ޝެޑިއުލުން ކައްސާލައިގެން ދާއިރު، ކޮންމެ ފަހަރަކު އާ ތާރީޚެއް ދިނުމަކީ ހައްލެއް ނޫނެވެ. ރައްޔިތުން މިއަދު ސުވާލު އުފައްދަނީ، މިހާރު މިދޭ 2027 ވަނަ އަހަރަކީވެސް "ސިހުރުވެރި" ތާރީޚަކަށް ވެ، އަނެއްކާވެސް އަންނަ އަހަރު އެ ތާރީޚު ބަދަލުވެދާނެ ކަމާމެދު އުފެދޭ ސުވާލެވެ.