ރައީސް ޞާލިޙްގެ ސަރުކާރުން ކުރިއަށް ގެންދިޔަ ބިންވެރިޔާ ސްކީމްގެ ދަށުން ގުޅިފަޅު އަދި ހުޅުމާލެ ތިންވަނަ ފިޔަވަހިން ގޯތި ލިބިފައިވާ ފަރާތްތަކަށް، އައު "ބަންޑާރަ ގޯތީގެ އެއްބަސްވުން" އަދި އައު "ބަންޑާރަ ގޯތީގެ ރަޖިސްޓަރީ" ހަވާލުކުރުމުގެ މަސައްކަތް ފެށުމަށް މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ނިންމައިފިއެވެ.

ހައުސިންގ މިނިސްޓްރީން ބުނީ، ރަޖިސްޓްރީތަކަށް ބަދަލު ގެންނަން ޖެހުނީ ހުޅުމާލެ ތިންވަނަ ފިޔަވަހީގެ އައު ލޭންޑް ޔޫސް ޕްލޭނަށް ގެނެވުނު ބަދަލާ ގުޅިގެން، ކުރިން އެ ސަރަޙައްދުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަންތަކަށް ބަދަލު އައުމާ ގުޅިގެން ކަމަށެވެ. މި ބަދަލާ ގުޅިގެން 20 ޑިސެންބަރު 2025 ގައި ވަނީ ގޯތިތަކުގެ އައު ލޮކޭޝަން ކަނޑައެޅުމަށް ގުރުއަތުލުން ބާއްވާފައެވެ.

އައު އެއްބަސްވުންތަކުގައި ސޮއިކުރުމާއި ރަޖިސްޓަރީ ދޫކުރުމުގެ ކަންކަން ކުރިއަށް ގެންދިއުމަށް ހަމަޖެހިފައިވަނީ "ހިޔާވެހި ޕޯޓަލް" މެދުވެރިކޮށް އެޕޮއިންޓްމަންޓް ހަމަޖައްސައިގެންނެވެ. އެގޮތުން 26 ޖަނަވަރީ 2026 އިން ފެށިގެން 15 މާރިޗު 2026 ގެ ނިޔަލަށް އެޕޮއިންޓްމަންޓަށް އެދުމުގެ ފުރުޞަތު މިހާރު ވަނީ ހުޅުވާލާފައެވެ. މި މުއްދަތުގެ ތެރޭގައި، ގުޅިފަޅުގެ އައު ލޭންޑް ޔޫސް ޕްލޭނަށް އައި ބަދަލާ ގުޅިގެން މިހާތަނަށް އެއްބަސްވުމުގައި ސޮއިނުކުރާ ފަރާތްތަކަށްވެސް އެ ފުރުޞަތު ލިބިގެންދާނެ ކަމަށް މިނިސްޓްރީން ބުނެއެވެ.

ޕޯޓަލް މެދުވެރިކޮށް އެޕޮއިންޓްމަންޓަށް އެދޭއިރު ހުށަހަޅަންޖެހޭ ލިޔެކިޔުންތަކުގެ ތެރޭގައި، ހެކިވެރިއެއްގެ ގޮތުގައި ސޮއިކުރާ ފަރާތުގެ އައިޑީ ކާޑު ކޮޕީ އާއި، ބަދަލުގައި މީހަކު ފޮނުވާނަމަ، ކޯޓުން ނުވަތަ ނޯޓަރީ ކުރިމަތީގައި ސޮއިކޮށްފައިވާ ޕަވަރ އޮފް އެޓަރނީ އާއި، ކުރިން ސޮއިކޮށްފައިވާ އެއްބަސްވުމާއި ރަޖިސްޓަރީގެ ކޮޕީ ހިމެނެއެވެ.

އޭގެއިތުރުން މިނިސްޓްރީން ބުނީ، އެޕޮއިންޓްމަންޓަށް ހާޟިރުވާއިރު ކުރިން ދޫކޮށްފައިވާ އެއްބަސްވުމާއި ރަޖިސްޓަރީގެ އަސްލު ގެންނަންވާނެ ކަމަށެވެ. އަދި އެޕޮއިންޓްމަންޓް ހަމަޖެހޭ ގަޑިއާއި ތަން ހިޔާވެހި ޕޯޓަލް މެދުވެރިކޮށް ނުވަތަ އެސްއެމްއެސް އެއްގެ ޒަރީޢާއިން އަންގަމުންދާނެ ކަމަށް މިނިސްޓްރީން ބުނެފައިވެއެވެ.

ހުޅުމާލޭ 3 ވަނަ ފިޔަވަހިން ގޯތި ދޫކުރުމަކީ މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ހޯދައިދިނުމަށް ރައީސް ޞާލިޙްގެ ސަރުކާރުން ފަށާފައިވާ މަސައްކަތެކެވެ.