ބޭންކް އޮފް މޯލްޑިވްސް (ބީއެމްއެލް) އިން ދޫކޮށްފައިވާ ކްރެޑިޓް ކާޑުތަކުން ރާއްޖޭން ބޭރުގައި ކުރެވޭ މުއާމަލާތްތަކުގެ ލިމިޓް 2 ގުނަ އިތުރުކުރުމަށް އެ ބޭންކުން ނިންމައިފިއެވެ.

ބީއެމްއެލް އިން ބުނީ، މި ނިންމުމުގެ ދަށުން، ބީއެމްއެލްގެ ކްލެސިކް ކްރެޑިޓް ކާޑުތަކުން މަހެއްގެ މައްޗަށް ކުރެވޭ ބޭރުގެ މުއާމަލާތްތަކުގެ ލިމިޓް 750 ޑޮލަރުން 1،400 ޑޮލަރަށް ވަނީ އިތުރުކޮށްފައި ކަމަށެވެ.

އަދި ގޯލްޑް ކާޑުތަކުގެ ލިމިޓް 750 ޑޮލަރުން 1500 ޑޮލަރަށް ބޮޑުކޮށްފައިވާއިރު، 'ޕްލެޓިނަމް' ކާޑުތަކުގެ ލިމިޓް ވަނީ 1،500 ޑޮލަރުން 3،000 ޑޮލަރަށް އިތުރުކޮށްފައެވެ.

ބޭންކުން ބުނީ، މި ނިންމުމަށް އަމަލުކުރަން ފަށާނީ 1 ފެބުރުވަރީ 2026 އިން ފެށިގެން ކަމަށެވެ.

ބީއެމްއެލްއިން މިގޮތަށް ނިންމާފައިވަނީ، ރާއްޖޭން ބޭރަށް ކުރާ ދަތުރުތަކާއި، އޮންލައިން ޝޮޕިންގް އާއި، ތައުލީމާއި، ސިއްހީ ކަންކަމަށް ކުރާ ހޭދަ ފަދަ ބައިނަލްއަގުވާމީ މުއާމަލާތްތަކުގައި ކާޑު ބޭނުންކުރާ ދިވެހިންނަށް އިތުރު ލުއިފަސޭހަކަމާއި ފުރުސަތުތައް ހޯދައިދިނުމުގެ ގޮތުންކަމަށް އެބޭންކުން ވަނީ ބުނެފައެވެ.