ގައުމީ ބޭންކް، ބޭންކް އޮފް މޯލްޑިވްސް އިން 2025 ވަނަ އަހަރުގެ ހަތަރުވަނަ ކުއާޓަރގައި ރެކޯޑް މާލީ ނަތީޖާއެއް ހާސިލް ކޮށްފައިވާ ކަމަށް ބޭންކުން ހާމަކޮށްފިއެވެ.

ބޭންކުން ބުނީ، މިދިޔަ އަހަރުގެ ފަހު ކުއާޓަރގައި ބޭންކަށް ހިންގުމުގެ ފައިދާގެ ގޮތުގައި 828.7 މިލިއަން ރުފިޔާ ލިބިފައިވާއިރު، މިއީ ބޭންކުގެ ތާރީޚުގައިވެސް ފާހަގަކޮށްލެވޭ ވަރުގަދަ ކުރިއެރުމެއް ކަމަށެވެ.

ބޭންކުގެ މިދިޔަ އަހަރުގެ ހަތަރުވަނަ ކުއާޓަރގެ ތަފާސްހިސާބުތަކަށް ބަލާއިރު، ސާފު ފައިދާގެ ގޮތުގައި 837.5 މިލިއަން ރުފިޔާ ވަނީ ލިބިފައެވެ. މިއީ ތިންވަނަ ކުއާޓަރއާ އަޅައި ބަލާއިރު 76.2 އިންސައްތައިގެ ބޮޑު ކުރިއެރުމެކެވެ. މުޅި 2025 ވަނަ އަހަރުގެ މާލީ ނަތީޖާއަށް ބަލާއިރު، ބޭންކަށް ލިބުނު ޖުމްލަ އާމްދަނީ ވަނީ 5.5 ބިލިއަން ރުފިޔާއަށްވުރެ މަތިވެފައެވެ. މިއީ 2024 ވަނަ އަހަރާ އަޅައިބަލާއިރު 16.1 އިންސައްތައިގެ ކުރިއެރުމެކެވެ.

ޓެކްސްއަށް ކެނޑުމުގެ ކުރިން ބޭންކަށް ލިބުނު ފައިދާ ވަނީ 2024 ވަނަ އަހަރާ އަޅައިބަލާއިރު 10 އިންސައްތަ އިތުރުވެ، ރެކޯޑް އަދަދެއް ކަމަށްވާ 3.2 ބިލިއަން ރުފިޔާއަށް އަރާފައެވެ. ބޭންކުގެ ޖުމްލަ އެސެޓް މިހާރު ހުރީ 55.7 ބިލިއަން ރުފިޔާގައެވެ. މިއީ ކުރީ އަހަރާ އަޅާބަލާއިރު 15 އިންސައްތައިގެ އިތުރުވުމެކެވެ. މީގެ އިތުރުން، ވޭތުވެދިޔަ އަހަރުގެ ތެރޭގައި ބޭންކުން ވަނީ ވިޔަފާރިތަކާއި އާންމު ފަރުދުންނަށް 10 ބިލިއަން ރުފިޔާގެ އާ ލޯނު ދޫކޮށްފައެވެ.

މި ކާމިޔާބީއާ ގުޅޭގޮތުން ބޭންކުގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، 2025 ވަނަ އަހަރު ކާމިޔާބު ކަމާއެކު ނިންމާލެވުމަކީ ލިބޭ ވަރަށް ބޮޑު އުފަލެއް ކަމަށެވެ. "މި ކުއާޓަރގެ ނަތީޖާއިން ދައްކުވައިދެނީ އަޅުގަނޑުމެންގެ އިސްތިރާޖީ އަމާޒަށް ވާސިލްވެފައިވާކަން. ބޭންކުގެ މައިގަނޑު ވިޔަފާރީގެ ދާއިރާތަކުން ހޯދި ކުރިއެރުމާއި، ހަރުދަނާ ރިސްކް މެނޭޖްމަންޓެއްގެ ސަބަބުން ވަރުގަދަ ބެލެންސް ޝީޓެއް ދެމެހެއްޓިފައިވޭ،" ޝަރީފް ވިދާޅުވިއެވެ.

ބޭންކުން ބުނީ، 2025 ވަނަ އަހަރަކީ ބީއެމްއެލްއިން ގައުމީ ތަރައްގީއަށް މުހިންމު މަޝްރޫއުތަކެއް ފެށި އަހަރެއް ކަމަށެވެ. މީގެ ތެރޭގައި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން، މިނިސްޓްރީ އޮފް ކޮންސްޓްރަކްޝަން ހައުސިންގ އެންޑް އިންފްރާސްޓްރަކްޗަރ އާއި ގުޅިގެން 5 އިންސައްތައިގެ ކުޑަ އިންޓްރެސްޓް ރޭޓެއްގައި 'ހިޔާވެހި ފައިނޭންސިންގ' ދޫކުރަން ފެށުން ހިމެނެއެވެ. އަދި ގެދޮރު ގަތުމަށް ދޫކުރާ ލޯނުތަކުގެ އިކުއިޓީ 5 އިންސައްތައަށް ދަށްކޮށް، 'ބީއެމްއެލް އެފޯޑަބަލް ހޯމް ލީސިންގ ޕްރައިވެޓް ލިމިޓެޑް' ގެ ނަމުގައި އާ ކުންފުންޏެއް ވަނީ އުފައްދާފައެވެ.

ބޭންކުގެ ޚިދުމަތް ފުޅާކުރުމުގެ ގޮތުން ރ. ދުވާފަރުގައި ބޭންކުގެ 40 ވަނަ ބްރާންޗް ހުޅުވައި، 'މުޅި ރާއްޖެއަށް ބީއެމްއެލް އޭޓީއެމް' މަޝްރޫއުގެ ދަށުން މީހުން ދިރިއުޅޭ ހުރިހާ ރަށެއްގައި ބޭންކުގެ ޚިދުމަތް މިހާރު ވަނީ ގާއިމުކޮށްފައިކަމަށް ބޭންކުން މަޢުލޫމާތު ދީފައިވެއެވެ. ޑިޖިޓަލް ދާއިރާއިން ބަލާއިރު، 'ސްވައިޕް' ޑިޖިޓަލް ވޮލެޓާއި، އިންޑިއަން ރޫޕީ އަދި ޗައިނީޒް ޔުއާން އެކައުންޓްތައް ތައާރަފުކުރުމަކީ ބޮޑު ކުރިއެރުމެއް ކަމަށް ބޭންކުން ބުނެފައިވެއެވެ.

ބޭންކުން ބުނީ، ކުދި އަދި މެދު ފަންތީގެ ވިޔަފާރިތަކަށް އެހީވުމަށް އެސްޑީއެފްސީ (މިހާރު އެސްއެމްއީ ޑިޖިޓަލް) ބޭންކުގެ ދަށަށް ގެނެސް، މާޗަންޓް ފީ 1 އިންސައްތައަށް ކުޑަކޮށްފައިވާ ކަމަށެވެ. ބޭންކުގެ މި މަސައްކަތްތަކުގެ އަގުވަޒަންކޮށް މާސްޓަރކާޑު ފަދަ ބައިނަލްއަގުވާމީ މުއައްސަސާތަކުން ވަނީ އެވޯޑްތައްވެސް ދީފައެވެ. ހަމައެއާއެކު މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 42 ބްރާންޗާއި 267 އޭޓީއެމް މެދުވެރިކޮށް ބީއެމްއެލްއިން ދަނީ ރައްޔިތުންނަށް މާލީ އެހީތެރިކަން ފޯރުކޮށްދެމުންނެވެ.