ރާއްޖޭގެ ޑިމޮކްރަސީ އަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރެއްވި އެއްވެސް ޚިދުމަތެއް ނެތް ކަމަށާއި، އެމަނިކުފާނު ދަންނަ ޑިމޮކްރަސީއަކީ ހަމައެކަނި އަމިއްލަ ފައިދާއަށް "ފެން އޮތް ކޮޅަކަށް ދިއުން" ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.

އިދިކޮޅު އެމްޑީޕީން ރޭ ބޭއްވި ހަރުގެ ޖަލްސާގައި ވާހަކަދައްކަވަމުން މީކާއިލް ވިދާޅުވީ، ރާއްޖެއަށް ޑިމޮކްރަސީ ގެނައުމަށް ކުރި ދަތުރުގައި ރައީސް މުއިއްޒަކީ އަބަދުވެސް އެންމެ ބޮޑު ފައިދާއެއް ލިބެން އޮންނަ ދިމާލަކަށް ވަޑައިގަންނަވާ "އޮޕޮޗުނިސްޓެއް" ކަމަށެވެ. އަދި އެމަނިކުފާނަކީ ސިޔާސީ މަސްލަހަތަށްޓަކައި އިރުއިރުކޮޅާ ކުލަޔާއި ދުލި ބަދަލުކުރައްވާ ބޭފުޅެއްގެ ގޮތުގައި މީކާއިލް ސިފަކުރެއްވިއެވެ.

"ރައީސް މުއިއްޒު ދަންނަ ޑިމޮކްރަސީ އަކީ އޮޕޮޗުނިޒަމް. ހިހޫތަނުން ކޮޅު ގޮހޮރަށް ކެއުން. ސިޔާސީ ހަޔާތް ފެށްޓެވީ އަދާލަތު ޕާޓީ އިން. ދެން ދުލި ބަދަލުކުރައްވައިގެން ސަން ސިޔާމް އަރިހުގައި. ދެން ޔާމީން އަރިހުގައި ހުންނެވީ. މިހާރު އެ މަނިކުފާނުގެ ކަރުގައި ޖައްސަވާ އެ ހުންނެވީ ޕީއެންސީ ނަންގަވައިގެން. އެހެންވީމަ ޑިމޮކްރަސީގެ ވާހަކަދައްކަވަން ރައީސް މުއިއްޒު ރީއްޗެއް ނޫން." މީކާއިލް ވިދާޅުވިއެވެ.

މީގެ އިތުރުން، އޭޕްރީލް 4 ގައި ބާއްވަން އުޅޭ ފެންނަ ނުފެންނަ ވޯޓަކީ ސިއްރުވެރި ގޮތަކަށް ބާއްވާ އިންތިޚާބެއް ކަމަށް އޭނާ ތުހުމަތު ކުރެއްވިއެވެ. އަދި އިންތިޚާބުތައް ގިނަވުމުން އުނދަނގޫވާ ކަމަށް ސަރުކާރުގެ ކެނޑިޑޭޓުން ބުނަމުންދާ ދިއުމަށް މީކާއިލް ވަނީ ވަރަށް ބޮޑަށް ފާޑުވިދާޅުވެފައެވެ.

އޭގެ އިތުރުން މީކާއިލް ވިދާޅުވީ، ރާއްޖެއަށް ޑިމޮކްރަސީ ގެނައުމަށްޓަކައި ރައްޔިތުންނަށް ލިބުނު އަނިޔާތަކާއި، ވީ ގުރުބާނީތައް އެމްޑީޕީން ދުވަހަކުވެސް ހަނދާން ނުނެތޭނެ ކަމަށެވެ. މިގޮތުން ޖަލުގައި މަރާލި އިވާން ނަސީމާއި، މޫދުގައި މަރުވެފައި އޮއްވާ ފެނުނު ސޮލާހާއި، ރިޟްވާނާއި ޔާމީން ރަޝީދުގެ މަރުގެ އިތުރުން 7 ފެބްރުއަރީގެ ހާދިސާތަކަކީ ފަސޭހައިން ހަނދާން ނައްތާލެވޭނެ ކަންކަން ނޫން ކަމަށް އޭނާ ވިދާޅުވިއެވެ.

ހަމައެއާއެކު ރައީސް މުއިއްޒަކީ ޑިމޮކްރަސީއާ ބީރައްޓެހި ބޭފުޅެއް ކަމަށް ފާހަގަކުރައްވައި މީކާއިލް ވިދާޅުވީ، އިންތިޚާބުތައް ބޭއްވުމަކީ އުނދަނގޫ ކަމަކަށް ވުމަކީ އެމަނިކުފާނުގެ ހިތްޕުޅުގައި ޑިމޮކްރަޓިކް ނިޒާމަށް އޮތް ނުރުހުން ހާމަވާ ކަމެއް ކަމަށެވެ.