ލޯނުތައް ދެއްކުމަށް ކުރި ހޭދައާއެކު ދައުލަތުގެ ބަޖެޓުން މި އަހަރުގެ މިހާތަނަށް 6.9 ބިލިއަނަށްވުރެ ގިނަ ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީން އެންމެ ފަހުން އާންމުކޮށްފައިވާ "ވީކްލީ ފިޒްކަލް ޑިވެލޮޕްމަންޓް" ރިޕޯޓުގައިވާ ގޮތުން، މިދިޔަ ފެބްރުއަރީ މަހުގެ 26 ވަނަ ދުވަހުގެ ނިޔަލަށް ދައުލަތުން ވަނީ ޖުމްލަ 6.9 ބިލިއަން ރުފިޔާ ހަރަދުކޮށްފައެވެ. މި ހަރަދުގެ ތެރޭގައި ރިކަރަންޓް ހަރަދާއި، ކެޕިޓަލް ހަރަދުގެ އިތުރުން ލޯނު ދެއްކުމަށް ކުރި ހޭދައާއި، އިންވެސްޓްމެންޓްތަކާއި ލެންޑިންގްސް ހިމެނެއެވެ.

މިދިޔަ އަހަރުގެ މި މުއްދަތާ އަޅާބަލާއިރު މިއަހަރުގެ ހަރަދުތައް ވަނީ ދަށްވެފައެވެ. ފާއިތުވި އަހަރުގެ މި މުއްދަތުގައި ދައުލަތުގެ ހަރަދު ހުރީ 8.6 ބިލިއަން ރުފިޔާގައެވެ.

ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް ރިކަރަންޓް ހަރަދުގެ ގޮތުގައި 5.4 ބިލިއަން ރުފިޔާ ހޭދަކޮށްފައިވާއިރު، ކެޕިޓަލް ހަރަދުގެ ގޮތުގައި ހޭދަކޮށްފައިވަނީ 434 މިލިއަން ރުފިޔާއެވެ.

އާމްދަނީއަށް ބަލާއިރު، މި އަހަރުގެ މި މުއްދަތުގައި ދައުލަތަށް އާމްދަނީގެ ގޮތުގައި 7.7 ބިލިއަން ރުފިޔާ ލިބިފައިވެއެވެ. މިއީ މިދިޔަ އަހަރުގެ މި މުއްދަތުގައި ލިބުނު 6 ބިލިއަން ރުފިޔާއާ އަޅާބަލާއިރު އިތުރު އަދަދެކެވެ.

މީގެ އިތުރުން، ބަޖެޓް ޕްރައިމަރީ ބެލެންސް މި އަހަރު 2.2 ބިލިއަން ރުފިޔާގެ ސާޕްލަސްއެއްގައި ހުރިއިރު، އޯވަރޯލް ބެލެންސް ހުރީ 1.8 ބިލިއަން ރުފިޔާގެ ސާޕްލަސްއެއްގައެވެ. މިދިޔަ އަހަރުގެ މި މުއްދަތުގައި ބަޖެޓް ޕްރައިމަރީ ބެލެންސް ހުރީ 1 ބިލިއަން ރުފިޔާގެ ސާޕްލަސްއެއްގައެވެ.

މި ތަފާސްހިސާބުތަކުން ދައްކާގޮތުގައި، ސަރުކާރުން އަންނަނީ ދައުލަތުގެ ހަރަދުތައް ކުޑަކޮށް، އާމްދަނީ އިތުރުކުރުމަށް މަސައްކަތްތަކެއް ކުރަމުންނެވެ.