އުމްރާއަށް މީހުން ގެންދާނެ ކަމަށް ބުނެ ގިނަ ބައެއްގެ އަތުން ފައިސާ ނަގައި އޮޅުވާލި މައްސަލައިގައި 3 އަހަރުގެ ޖަލު ހުކުމެއް ތަންފީޒު ކުރަމުންދާ އަލް މަޝްޢަރު ޓުއާސް ގްރޫޕްގެ ވެރިޔާ ޢަލީ ފާރިޝް، ގޭބަންދަށް ބަދަލުކޮށްފިއެވެ.

މި މައްސަލައިގައި ފާރިޝްގެ މައްޗަށް ކުށް ސާބިތުވެ، ތިން އަހަރާއި ދެ މަސް ދުވަހާއި 12 ދުވަހަށް ޖަލަށް ލުމަށް ކްރިމިނަލް ކޯޓުން ހުކުމް ކުރީ 2025 ސެޕްޓެމްބަރު 17 ގައެވެ. މޯލްޑިވްސް ކަރެކްޝަނަލް ސާވިސްއިން މައުލޫމާތު ދޭ ގޮތުގައި، ފާރިޝް ގޭބަންދަށް ބަދަލުކުރީ އޭނާގެ ސިއްހީ ހާލަތާ ގުޅިގެން ވަގުތީ ގޮތުންނެވެ. ނަމަވެސް، އޭނާގެ ސިއްހީ ހާލަތާ ގުޅޭ އިތުރު ތަފްސީލެއް ކަރެކްޝަނުން ހާމަކޮށްފައެއް ނުވެއެވެ.

ދައުލަތުން ޢަލީ ފާރިޝްގެ މައްޗަށް ދައުވާ ކުރީ، ރާއްޖެއިން އުމްރާއަށް މީހުން ގެންދިއުމަށްޓަކައި އޭސް އޭވިއޭޝަން ސާވިސް އާއި އޭސް ޓްރެވެލް މޯލްޑިވްސް މެދުވެރިކޮށް 48 މީހެއްގެ ޓިކެޓު ބުކިން ހެދުމަށްފަހު، އެކަމަށް ދައްކަންޖެހޭ ފައިސާ ނުދެއްކި މައްސަލައިގައެވެ. މި ފައިސާ ދެއްކުމަށްޓަކައި އެ ކުންފުނީގެ އެކައުންޓުން ދޫކުރި ދެ ޗެކެއް ވަނީ ބައުންސްވެފައެވެ. އޭގެ ތެރޭގައި ހިމެނެނީ 390,126 ރުފިޔާގެ ޗެކަކާއި 156,050 ރުފިޔާގެ ޗެކެކެވެ.

ކޯޓުގެ ހުކުމުގައި ފާރިޝް ޖަލަށްލުމުގެ އިތުރުން، އޭސް އޭވިއޭޝަނާއި އޭސް ޓްރެވެލަށް ލިބުނު ގެއްލުމުގެ ބަދަލުގެ ގޮތުގައި 26,350.32 ޑޮލަރު (406,321 ރުފިޔާ) އެ ކުންފުންޏަށް ދެއްކުމަށް ވެސް ވަނީ އަމުރުކޮށްފައެވެ. މި ފައިސާ ދެ އަހަރު ދުވަހުގެ ތެރޭގައި ދައްކައި ހަލާސްކުރުމަށް ކޯޓުން ވަނީ މުހުލަތު ދީފައެވެ.

މަޝްޢަރު ގްރޫޕުން އުމްރާއަށް ގެންދާނެ ކަމަށް ބުނެ ގިނަ ބައެއްގެ އަތުން ފައިސާ ނެގުމަށްފަހު، އުމްރާއަށް ނުގެންގޮސް އޮޅުވާލާފައިވާ މައްސަލައަކީ އާންމުންގެ ބޮޑު ކަންބޮޑުވުމެއް އޮތް މައްސަލައެކެވެ. އޭރު މި މައްސަލަ ފެންމަތިވުމާއެކު ފުލުހުން ވަނީ އެ މައްސަލަ ވަރަށް ސީރިއަސްކޮށް ބަލާފައެވެ.

ފާރިޝް ގޭ ބަންދަށް ބަދަލު ކޮށްފައިވާއިރު، މިއަހަރުގެ ރަމަޟާން މަހުގެ ފަހު 15 ގައި ޢުމްރާއަށް ގެންގޮސްދޭނެ ކަމަށް ބުނެ، 'އަލް އަބްރާރު ޕްރައިވެޓް ލިމިޓެޑް' ކިޔާ ގްރޫޕަކުން 110 މީހެއްގެ އަތުން ފައިސާ ނެގުމަށްފަހު ޢުމްރާއަށް ގެންގޮސްފައިނުވާ މައްސަލައެއް ވަނީ ފެންމަތިވެފައެވެ.