ދެ މެޖިސްޓްރޭޓެއްގެ ސުލޫކީ މައްސަލަ ތަޙްޤީޤު ކުރުމަށް ޖޭއެސްސީން ނިންމައިފިއެވެ.

ޖޭއެސްސީން ނެރެފައިވާ ބަޔާނެއްގައި ވަނީ އެކޮމިޝަނުން މިމަހު ބޭއްވުނު ދެ ބައްދަލުވުމެއްގައި ހުށަހެޅުނު މައްސަލަތަކުގެ ތެރެއިން ސ.މީދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް މުޙައްމަދު ޠައްޔިބާއި، ޏ.ފުވައްމުލަކު މެޖިސްޓްރޭޓް ކޯޓުގެ މެޖިސްޓްރޭޓް އަޙްމަދު އަކްރަމްގެ ސުލޫކީ މައްސަލަތައް ބެލުމަށް ކޮމިޓީއިން ނިންމާފައިވާތީ، ކޮމިޝަނުން މި މައްސަލަތައް ތަޙްޤީޤު ކުރުމަށް، ތަޙްޤީޤު ކޮމިޓީ އެކުލަވާލާފައިވާކަމަށެވެ.

News Briefing: S.Meedhoo Magistrate Court ge IsMagistrate Mohamed Thayyib aai GN.Fuvammulaku Magistrate Court ge Magistrate Ahmed Akram ge massala thahugeeg kurumah committee ekulavaalun pic.twitter.com/WtP8sP4b4e

— JSC Maldives (@MaldivesJSC) October 13, 2020

މީދޫ މެޖިސްޓްރޭޓް ތައްޔިބު އާއި ގުޅޭގޮތުން ޖޭއެސްސީން ތަޙުޤީޤު ކުރަމުންދަނީ ސ.މީދޫ މެޖިސްޓްރޭޓް ކޯޓަށް ހުށަހެޅުނު މައްސަލައެއްގައި ތުހުމަތުކުރެވޭ މީހާގެ ބަންދުގެ މުއްދަތު އިތުރުކުރުމަށް ގެންދިއުމުން ސ.މީދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް މުޙައްމަދު ޠައްޔިބު، މި މައްސަލައިގައި ގޮތެއް ނިންމެވުމުގައި ޤާނޫނާ ޚިލާފަށް އަމަލުކުރައްވާފައިވާކަމަށް ބެލެވޭ މައްސަލަ އެވެ.

ފުވައްމުލަކު މެޖިސްޓްރޭޓް ކޯޓުގެ މެޖިސްޓްރޭޓް އަޙްމަދު އަކްރަމް އާއި ގުޅޭގޮތުން ތަޙުޤީޤު ކުރަމުންދަނީ ޙުކުމް ކުރެއްވި މައްސަލައެއްގައި، ޝަރީޢަތް ނިމުނުގޮތުގެ ޚުލާސާ ރިޕޯޓް ދޫކުރިފަހުން އެ ރިޕޯޓަށް ބަދަލުގެނެސް ބައެއް ނުކުތާ އިތުރުކުރިކަމަށް ބުނާ މައްސަލައަކާއި، ކޯޓުގެ ދެ ޤަޟިއްޔާއެއް ބެލުމުން ތަނާޒުލްވެފައިވަނީ ހަޤީޤަތާ ޚިލާފު މައުލޫމާތެއް ހިއްސާކުރުމަށްފަހުކަމަށް ބެލެވޭ މައްސަލައެއްކަމަށް ޖޭއެސްސީން ވަނީ ބުނެފައެވެ.