ރޭ މާލޭގައި އެމްޑީޕީން ކުރިއަށް ގެންދިޔަ ސިލްސިލާ މުޒާހަރާތަކުގެ ތެރެއިން، ފުލުހުން ބާރުގެ ބޭނުންކޮށް އެ ޕާޓީގެ އާންމު މެންބަރެއްގެ ގަޔަށް ކަރަންޓު މުގުރު ޖައްސައި ބޮޑެތި އަނިޔާތަކެއް ދީފި ކަމަށް އެ ޕާޓީން ބުނެފިއެވެ.

މި ހާދިސާ ހިނގާފައިވަނީ މުޒާހަރާގެ ބައިވެރިންނާއި ފުލުހުންނާ ދެމެދު ކުރިމަތިލުންތަކެއް ހިނގަމުން ދިޔަ ވަގުތެއްގައެވެ. މަންޒަރު ދުށް މީހުން މައުލޫމާތު ދޭ ގޮތުގައި، ފުލުހުން ކަރަންޓު މުގުރު ބޭނުންކުރުމާއެކު އެ މީހާ ވަނީ ވަގުތުން ހޭނެތިގެން މަގުމައްޗަށް ވެއްޓިފައެވެ.

މި ހާދިސާ ހިނގި ވަގުތު މަންޒަރު ދުށް ފަރާތްތަކުން ފާހަގަކުރި ގޮތުގައި، އަނިޔާލިބި ހޭނެތިގެން ވެއްޓިފައި އޮތް މީހާއަށް އެހީތެރިވުމުގެ ބަދަލުގައި ފުލުހުން ވަނީ އޭނާއަށް އެއްވެސް ސަމާލުކަމެއް ނުދީ ދޫކޮށްލާފައެވެ.

މުޒާހަރާގެ ބައިވެރިއެއް ހަބަރު ހުސްވެގެން ހޮސްޕިޓަލަށް ވަނީ ގެންގޮސްފައި. ހަބަރު ލިބޭ ގޮތުގައި ފުލުހުން ވަނީ ކަރަންޓް މުގުރު ޖައްސާފައި.

އެމްޑީޕީއިން ކުރިއަށް ގެންދާ ސިލްސިލާ ކުއްލި ހަރަކާތް ކުރިއަށްދަނީ. pic.twitter.com/8TZeWL7Ixe

— MDP Secretariat (@MDPSecretariat) April 21, 2026

އިންސާނިއްޔަތުކަމުގެ ކަންފުޅެއްވެސް ނެތް ގޮތަށް ފުލުހުން އަމަލުކުރި ކަމަށް ބުނެ މުޒާހަރާގެ ބައިވެރިން ވަނީ ވަރަށް ބޮޑަށް ނުރުހުން ފާޅުކޮށްފައެވެ. އޭނާ ހޮސްޕިޓަލަށް ގެންދިއުމުގެ މަސައްކަތްވެސް ކުރަން ޖެހުނީ އެ ސަރަހައްދުގައި ތިބި އާންމު ރައްޔިތުންނަށެވެ.

އާންމުންގެ އެހީތެރިކަމާއެކު އެ މީހާ ހޮސްޕިޓަލަށް ގެންގޮސް މިހާރު ދަނީ ފަރުވާ ދެމުންނެވެ. އެމްޑީޕީން ވަނީ ފުލުހުން އާންމު ރައްޔިތުންނާ ދެކޮޅަށް ނަހަމަ ގޮތުގައި ބާރުގެ ބޭނުންކުރަމުންދާ ކަމަށް ބުނެ އެކަން ހަރުކަށި އިބާރާތުން ކުށްވެރިކޮށްފައެވެ.

މި ހާދިސާއާ ގުޅިގެން ފުލުހުންގެ ފަރާތުން ރަސްމީ ބަހެއް އަދި ލިބިފައި ނުވާއިރު، މުޒާހަރާގެ ތެރޭގައި ހިނގާދިޔަ މި ހަމަނުޖެހުމުގެ ވީޑިއޯތައް ސޯޝަލް މީޑިއާގައި ދަނީ ދައުރުވަމުންނެވެ.