ގދ. ގައްދޫ މަގު ހެދުމުގެ މަސައްކަތް މިމަހުގެ 23 ވަނަ ދުވަހު ފަށާނެކަމަށް ރޯޑް ޑިވެލޮޕްމެންޓް ކޯޕަރޭޝަން ލިމިޓެޑުން ބުނެފިއެވެ.

ދައުލަތުގެ މީޑިއާއަށް މަޢުލޫމާތުދެއްވަމުން ރޯޑް ޑިވެލޮޕްމެންޓް ކޯޕަރޭޝަން ލިމިޓެޑްގެ މެނޭޖިން ޑިރެކްޓަރ މޫސާ އަލިމަނިކު ވިދާޅުވީ މަގުހެދުމުގެ މަޝްރޫޢުގެ 11 އިންސައްތަ މަސައްކަތް މިހާރުވެސް ނިމިފައިވާކަމަށެވެ. އަދި އެ ކުންފުނީގެ އަމާޒަކީ ކަނޑައަޅާފައިވާ މުއްދަތުގެ ތެރޭގައި އެ މަސައްކަތް އެއްކޮށް ނިންމާލުންކަމަށްވެސް އޭނާ ވިދާޅުވިއެވެ. މި މަސައްކަތް ކުރުމަށްޓަކައި ޑިޒައިން އާއި އީ.އަ.އި.އޭގެ މަސައްކަތް މިހާރު ކުރިއަށް ދާއިރު މަގު ހެދުމަށް ބޭނުންވާ ސާމާނު މިހާރު ވަނީ އެރަށަށް ގެންގޮސްފައެވެ.

"ސެޓްލްމަންޓް ޓޭންކް ހެދުމާއި، ކޭބަލް ޖަންކްޝަން ހެދުމާއި، ސްޓޯމް ވޯޓަރ މެނޭޖްމަންޓް ސިސްޓަމް ހެދުމާއި ތާރު އެޅުމަށްވެސް ހަމަޖެހިފައިވޭ. އަދި ޓްރެފިކް ނިޝާންތައް ކުރެހުމާއި ލައިޓް ހަރުކުރުމުގެ މަސައްކަތް ކުރާނެ." ރޯޑް ޑިވެލޮޕްމެންޓް ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރ މޫސާ އަލިމަނިކު ވިދާޅުވިއެވެ.

ގދ.ގައްދޫ މަގުހެދުމުގެ މަޝްރޫޢުގެ މަސައްކަތް ކުރުމަށް ރޯޑް ޑިވެލޮޕްމެންޓް ކޯޕަރޭޝަން ލިމިޓެޑާ ހަވާލުކޮށްފައި ވަނީ މިދިޔަ އަހަރުގެ ޑިސެމްބަރުމަހުގެ ތެރޭގައެވެ.

މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރއިން އެކޯޕަރޭޝަނާއި ހަވާލުކޮށްގެން ކުރިއަށް ގެންދާ މި މަޝްރޫއުގައި ގައްދޫގެ ރިންގްރޯޑް ހިމެނޭގޮތަށް 6 މަގެއް ޒަމާނީ ފެންވަރަށް ތާރު އަޅައިގެން ހެދުމަށް ވަނީ ހަމަޖެހިފައެވެ. އެގޮތުން ގދ.ގައްދޫގައި ހެދުމަށް ހަމަޖެހިފައިވަނީ 6 ކިލޯމީޓަރުގެ މަގެވެ. މިއީ ދަޢުލަތުގެ ބަޖެޓުން 29 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ.