ކުޅުދުއްފުށި ސިޓީގައި މަސައްކަތްކުރާ އިތުރު ދެ ފުލުހުން ޕޮޒިޓިވްވެ، މި ކްލަސްޓަރ އިން ޕޮޒިޓިވްވީ ފުލުހުންގެ ޢަދަދު 15 އަށް އަރައިފިއެވެ.

މި ދެ ފުލުހުން ޕޮޒިޓިވްވިކަން އެނގުނީ ކުޅުދުއްފުށީ ޕޮލިސް ސްޓޭޝަނުގައި ކޭޓަރިންގެ ހިދުމަތް ދެމުންދާ ކުންފުނީގެ ތިން ބިދޭސީއަކު ޕޮޒިޓިވްވުމާ ގުޅިގެން ނެގި ރޭންޑަމް ސާމްޕަލްތަކަކުންނެވެ. އެގޮތުން ކުޅުދުއްފުށީ ޕޮލިސް ސްޓޭޝަނުގައި މަސައްކަތް ކުރާ ފުލުހުންނާއި ސިފައިންގެ އޮފިސަރުންގެ 75 ސާމްޕަލެއް ވަނީ ނަގާފައެވެ.

މި ސާމްޕަލްތަކުގެ ތެރެއިން 2 ފުލުހުން ޕޮޒިޓިވް ވެފައިވާއިރު، މިއަދު ޕޮޒިޓިވްވި ދެ ފުލުހުންނަކީ ކަރަންޓީނުގައި ތިބި ފުލުހުން ކަމަށް ނުވާތީ ކޮންޓެކްޓް ޓްރޭސިންގެ މަސައްކަތް މިހާރު ދަނީ ކުރަމުންނެވެ.

މާލެއިން ތިލަދުންމައްޗަށް ދަތުރުކުރި ފުލުހުންތަކާ ކޮންޓެކްޓްވެ ފުރަތަމަ ޕޮޒިޓިވްވެފައިވަނީ ކުޅުދުއްފުށީ ޕޮލިސް ސްޓޭޝަންގައި މަސައްކަތްކުރާ ކުރިނބީއަށް ނިސްބަތްވާ ފުލުހެކެވެ. އޭގެ ފަހުން ހަމަ އެ ޕޮލިސް ސްޓޭޝަންގައި މަސައްކަތްކުރާ އިތުރު ދެ ފުލުހަކުވެސް ޕޮޒިޓިވްވި އެވެ. އަދި ށ ފޯކައިދޫގައި މަސައްކަތްކުރާ ފުލުހަކުވެސް ވަނީ ޕޮޒިޓިވްވެފަ އެވެ.

ކުޅުދުއްފުށީ ޕޮލިސް ކްލަސްޓަރ އާއި ގުޅިގެން މިހާތަނަށް 15 ފުލުހަކު ވަނީ ބައްޔަށް ޕޮޒިޓިވް ވެފައެވެ.