"އަދަދު" އޮންލައިން ނޫހުގެ ނޫސްވެރިޔާ ލީވާން އަލީ ނާސީރު، ފުލުހުންގެ ބަންދުގައި 10 ދުވަސް ވަންދެން ބެހެއްޓުމަށްފަހު މިއަދު ދޫކޮށްލައިފިއެވެ.

އޭނާ ހައްޔަރުކުރެވުނު މައްސަލައާ ގުޅިގެން ގިނަ ބައެއްގެ ސަމާލުކަން ހުއްޓިފައިވަނިކޮށް، ބަންދުން ދޫކޮށްލި ނަމަވެސް މިކަމާ ގުޅޭގޮތުން ފުލުހުންގެ އިދާރާއިންނާއި ރަސްމީ ފަރާތްތަކުން އަދި ވަކި އެއްޗެއް ހާމަކޮށްފައެއް ނުވެއެވެ.

ލީވާން ބަންދުގައި ހުރި މުއްދަތުގައި ނޫސްވެރިންގެ ހައްގުތަކަށާއި ނޫސްވެރިކަމުގެ މިނިވަންކަމަށް ވަކާލާތުކުރާ ފަރާތްތަކުން ދިޔައީ ކަންބޮޑުވުން ފާޅުކުރަމުންނެވެ.

މި ހާދިސާއާ ގުޅިގެން "އަދަދު" ނޫހުން ބުނެފައިވަނީ، ލީވާން ދޫކޮށްލުމަކީ ލިބުނު ވަރަށް ބޮޑު ހިތްހަމަޖެހުމެއް ކަމަށާއި، ނޫސްވެރިންނަށް ބިރުދެއްކުމެއް ނެތި މިނިވަންކަމާއެކު މަސައްކަތް ކުރުމުގެ މާހައުލެއް ގާއިމްވެފައި އޮތުމަކީ ޑިމޮކްރަސީއެއްގައި ކޮންމެހެން މުހިންމު ކަމެއް ކަމަށެވެ.

އަދި ކުރިއަށް އޮތް ތަނުގައިވެސް ޒިންމާދާރު ނޫސްވެރިކަމެއް ކުރުމުގައި އެ ނޫހުން ސާބިތުވެ އޮންނާނެ ކަމުގެ ޔަގީންކަން އަދަދު ނޫހުން ވަނީ ދީފައެވެ.