ޗައިނާއިން ވަނީ ހޮރްމޫޒް ކަނޑުއޮޅިއަކީ ހުރިހާ ވިޔަފާރި އުޅަނދުފަހަރަކަށް އަމާން އަދި ރައްކާތެރި ތަނަކަށް ހެދުމަށް ބާރުއަޅާފައެވެ. އަދި މިއީ ދުނިޔޭގެ ވިޔަފާރިއާއި ހަކަތައިގެ ރައްކާތެރިކަން ދެމެހެއްޓުމަށް ނުހަނު މުހިންމު މަގަކަށް ވާތީ، އެ މަގު ބަންދުނުކޮށް ހުޅުވާފައި ބޭއްވުމުގެ މުހިންމުކަން ޗައިނާއިން ވަނީ ފާހަގަކޮށްފައެވެ.

މެދުއިރުމަތީގެ މަސްރަހު ނުތަނަވަސްވެ، ބައިނަލްއަގުވާމީ ކަނޑުދަތުރުފަތުރަށް ހުރަސްއެޅިދާނެ ކަމުގެ ބިރު ބޮޑުވެފައިވާ ދަނޑިވަޅެއްގައި ޗައިނާއިން މިގޮތަށް ގޮވާލާފައިވަނީ، ދުވާލެއްގެ މައްޗަށް އެތައް މިލިއަން ފީފާ ތެލާއި ގުދުރަތީ ގޭސް މި ކަނޑުއޮޅިން އުފުލާތީއެވެ. އެހެންކަމުން، މި މަގަށް އެއްވެސް ބުރޫއެރުމެއް ނައިސް ބޭއްވުމަކީ މުޅި ބައިނަލްއަގުވާމީ މުޖުތަމައުގެ މަސްލަހަތު ހިމެނޭ ކަމެއް ކަމަށް ބެއިޖިންގްއިން ބުނެފައިވެއެވެ.

ޗައިނާގެ އޮފިޝަލުން ވަނީ ހުރިހާ ފަރާތްތަކަކުންވެސް ކެތްތެރިކަން އިސްކޮށް، ހާލަތު އިތުރަށް ގޯސްވެދާނެ ފަދަ އަމަލުތަކުން ދުރުހެލިވުމަށް އިލްތިމާސްކޮށްފައެވެ. އަދި މަޝްވަރާގެ އުސޫލުން ސަރަހައްދީ ސުލްހައާއި ހަމަޖެހުން ގާއިމުކުރުމަށް މަސައްކަތް ކުރުމަށްވެސް ވަނީ ބާރުއަޅާފައެވެ.

މީގެ އިތުރުން، ދުނިޔޭގެ ބާޒާރުގެ ހަމަޖެހުމަށްޓަކައި ކަނޑުދަތުރުފަތުރުގެ މިނިވަންކަމާއި މެދުނުކެނޑި ވިޔަފާރި ކުރެވޭނެ މާހައުލެއް އޮތުން ކޮންމެހެން މުހިންމު ކަމަށްވެސް އެގައުމުން ބުނެއެވެ.

ހޮރްމޫޒް ކަނޑުއޮޅީގެ ދަތުރުފަތުރަށް އެއްވެސް ހުރަހެއް ކުރިމަތިވެއްޖެނަމަ، އޭގެ ނޭދެވޭ އަސަރު މުޅި ދުނިޔެއަށް ކުރާނެއެވެ. އޭގެ ތެރޭގައި ހަކަތައިގެ އަގު އުފުލުމާއި، ތަކެތި ފޯރުކޮށްދިނުމުގެ ނިޒާމަށް ބުރޫއެރުމާއި، ދުނިޔޭގެ އިގްތިސާދީ ނުތަނަވަސްކަން އިތުރުވުން ހިމެނެއެވެ.

ދުނިޔޭގެ ބާޒާރުތަކުން މި ކުރިއެރުންތަކަށް ފާރަވެރިވަމުންދާއިރު، ދުނިޔޭގެ އެންމެ މުހިންމު އެއް ކަނޑުދަތުރުފަތުރުގެ މަގު ރައްކާތެރިކަމާއެކު ހުޅުވާފައި ބޭއްވުމަށް ހުރިހާ ގައުމުތަކަކުން ގުޅިގެން މަސައްކަތް ކުރުމަށް ޗައިނާއިން ވަނީ ގޮވާލާފައެވެ.