7 ފެބްރުއަރީ 2012 ގައި ރައީސް މުހަންމަދު ނަޝީދުގެ އިސްތިއުފާގެ ސިޓީ ރައްޔިތުންގެ މަޖިލީހަށް ހުށައެޅީ ގާނޫނު އަސާސީއާއި ޚިލާފަށް ކަމަށް ވިދާޅުވެ ކްރިމިނަލް ކޯޓުގެ ކުރީގެ އިސްގާޒީ އަހުމަދު ހައިލަމް ފޮރިން މިނިސްޓަރު އަބުދު ﷲ ޝާހިދަށް ވަރުގަދަ ރައްދެއް ދެއްވައިފިއެވެ.

2012 ވަނަ އަހަރުގެ ފެބުރުއަރީ މަހުގެ 7 ވަނަ ދުވަހު އޭރުގެ ރައީސް މުހަންމަދު ނަޝީދު އިސްތިއުފާ ދެއްވީ ސަރުކާރާއި ދެކޮޅަށް އިދިކޮޅު ފަރާތްތަކުން މުޒާހަރާކޮށް ހިނގި ހަމަނުޖެހުންތަކުގައި ސަލާމަތީ ބާރުތައް މުޒާހާރާގެ ބައިވެރިންނަށް ބައިއަތު ހިފުމުންނެވެ. ރައީސް އޮފީހުގައި ރައީސް މުހަންމަދު ނަޝީދު އިސްތިއުފާ ދެއްވުމަށްފަހު އިސްތިއުފާގެ ސިޓީ މަޖިލީހަށް ހުށައެޅުއްވީ ކުރީގެ ޑިފެންސް މިނިސްޓަރު ކާނަލް ރިޓަޔަޑް މުހަންމަދު ނާޒިމާއި ކުރީގެ ކޮމިޝަނަރ އޮފް ޕޮލިސް އަބުދު ﷲ ރިޔާޒެވެ. އޭރުގެ އެ ދެބޭފުޅުންނަކީ ގާނޫނީ އެއްވެސް ހައިސިއްޔަތެއް ނެތް އާންމު ދެ ފަރުދުންނެވެ. ރައްޔިތުންގެ މަޖިލީހުގެ ރައީސްގެ މަގާމުގައި އޭރު ހުންނެވި އަބުދު ﷲ ޝާހިދު އެދުވަހު ވަނީ އިސްތިއުފާގެ ސިޓީ އޭނާގެ އަތްޕުޅަށް ނުވަތަ މަޖިލީހަށް ލިބިވަޑައިގެންނެވުމުން އޭރުގެ ނާއިބް ރައީސް ޑރ.މުހަންމަދު ވަހީދު ހަސަން ލައްވައި ރައީސް ކަމުގެ ހުވާކުރައްވާފައެވެ.

ރައީސް ނަޝީދު އިސްތިއުފާ ދެއްވުމާއި އެއަށް ފަހު އޭރުގެ ނާއިބް ރައީސް ރައީސް ކަމުގެ މަގާމުގެ ހުވައި ކުރެއްވުމާއި ގުޅޭ ގޮތުން ޝާހިދު ދެއްކެވި ވާހަކަތަކަށް ރައްދު ދެއްވަމުން ކްރިމިނަލް ކޯޓުގެ ކުރީގެ އިސްގާޒީ އަހުމަދު ހައިލަމް ވިދާޅުވީ ރައީސް އިސްތިއުފާ ދެއްވިކަން ބަޔާންކޮށް ރައީސް އޮފީހުން ފޮނުވާ ސިޓީއެއް އާންމުންގެ ދެ މީހަކު ހިފައިގެން ދިޔުމުން އެ ސިޓީ ބަލައިގަންނަން ޖެހޭނެ އެއްވެސް ގާނޫނީ އަސާސެއް ނޯންނާނެ ކަމަށެވެ.

"އެއީ ގާނޫނޫ އަސާސީގެ 121 ވަނަ މާއްދާ އާއި އެއްގޮތަށް ހުށައެޅުނު ސިޓީއަކަށް ނުވާނެ." ހައިލަމް ވިދާޅުވިއެވެ.

ގާނޫނޫ އަސާސީގެ 121 ވަނަ މާއްދާގައި ބުނެފައިވަނީ ރައީސުލްޖުމްހޫރިއްޔާ އޭނާގެ މަގާމުން އިސްތިއުފާ ދޭން ބޭނުންވެއްޖެނަމަ ސިޓީއަކުން އެކަން ބަޔާންކޮށް ރައްޔިތުންގެ މަޖިލީހަށް ހުށައަޅައި އެސިޓީ ރައްޔިތުންގެ މަޖިލީހުގެ ރައީސަށް ލިބުމުން ރައީސުލްޖުމުހޫރިއްޔާ އޭނާގެ މަގާމުން ވަކިވީ ކަމަށެވެ. އެމްޑީޕީގެ އެންމެ ފުރަތަމަ ސަރުކާރު ބަދަލުކުރީ ބަޣާވާތަކުން ކަމަށް އެމްޑީޕީން ވަނީ ބުނެފައެވެ.

ދައުލަތުގެ މީޑިއާގެ ޕްރޮގްރާމެއްގައި ރޭ ވާހަކަ ދައްކަވަމުން މިހާރުގެ ޚާރިޖީ ވަޒީރު އަބްދުﷲ ޝާހިދު ވިދާޅުވީ ރައީސުލްޖުމްހޫރިއްޔާގެ މަޤާމުން ރައީސް މުހައްމަދު ނަޝީދު އިސްތިއުފާދެއްވި ދުވަހަކީ ރައްޔިތުންގެ މަޖިލީހުގައި ހޭދަކުރެއްވި ދިގު މުއްދަތުގައި ދިމާވި އެންމެ ދަތިފުޅުވި އެއް ދުވަސްކަމަށެވެ.

ޝާހިދު ވިދާޅުވީ މިހާރު އަމަލުކުރަމުންދާ ޤާނޫނު އަސާސީއާ ކުރިން ރާއްޖޭގައި އަމަލުކުރަމުންއައި ޤާނޫނު އަސާސީގެ އެންމެ ބޮޑު އެއް ތަފާތަކީވެސް އެކި މަޤާމުތަކުގައި ތިއްބަވާ ބޭބޭފުޅުން މަޤާމުތަކުން އިސްތިއުފާދެއްވުމުގެ އުސޫލުކަމަށެވެ. އެގޮތުން ކުރިން އޮންނަ އުސޫލުގެ ދަށުން މަޤާމުން ބޭފުޅަކު އިސްތިއުފާ ދެއްވިޔަސް، އިސްތިއުފާ ޤަބޫލުނުކުރާހާ ހިނދެއްގައި އެބޭފުޅަކު ހުންނަވާނީ މަޤާމުގައިކަމަށެވެ. ނަމަވެސް މިހާރު އަމަލުކުރަމުންދާ ޤާނޫނުއަސާސީގެ ދަށުން އެއްވެސް ބޭފުޅަކު މަޤާމަކުން އިސްތިއުފާދެއްވައިފިނަމަ އެމީހަކު ހުށައަޅާ އިސްތިއުފާގެ ސިޓީ ފޮނުުވުމާއެކު އެމަޤާމު ހުސްވާކަން ޝާހިދު ފާހަގަކުރެއްވިއެވެ. އަދި ރައީސުލްޖުމްހޫރިއްޔާގެ މަޤާމު ހުސްވުމުގެ މާއްދާގައިވެސް އޮންނަނީ ހަމަ އެމޭރުމުންކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ ރައްޔިތުންގެ މަޖިލީހުގެ ރައީސްގެ އަތްޕުޅަށް ރައީސުލްޖުމްހޫރިއްޔާގެ އިސްތިއުފާގެ ސިޓީ ލިބުމުން އެމަޤާމު ހުސްވީކަމަށެވެ. އެއީ ރައްޔިތުންގެ މަޖިލީހުގެ ރައީސަށް ގޮތް ނިންމުމުގެ އިޚްތިޔާރު އޮންނަ ކަމަކަށް ނުވުމުން ފެބްރުއަރީ 7 ވަނަ ދުވަހު އަމަލުކުރެއްވީ ކޮންމެ ހާލަތެއްގައިވެސް ޤާނޫނު އަސާސީ ނަގަހައްޓައި ހިފެހެއްޓުމަށްކަމަށް ޝާހިދު ވިދާޅުވިއެވެ.

ނަމަވެސް ކްރިމިނަލް ކޯޓުގެ އިސް ގާޒީ ހައިލަމް ވިދާޅުވި ފަދައިން އެދުވަހު ރައީސް ނަޝީދުގެ އިސްތިއުފާގެ ސިޓީ ރައްޔިތުންގެ މަޖިލީހަށް ގެންދިޔައީ އެކަމަށް އޮންނަ ރަސްމީ އުސޫލުން ނޫން ކަމަށް އެމްޑީޕީގެ އިސް ފަރާތްތަކުން ވެސް ގެންދަވަނީ ވިދާޅުވަމުންނެވެ.