ރަސްމާލެ ފަދަ ރައްޔިތުންނާ ގުޅުންހުރި ބޮޑެތި ބިންތައް ބޭރުގެ ފަރާތްތަކަށް ދިނުމުގެ އެއްބަސްވުންތަކުގައި ސޮއިކުރުމުގެ ކުރިން، އެކަމުގައި ރައްޔިތުންގެ ފެންނަ ނުފެންނަ ވޯޓެއް ނަގަންޖެހޭނެ ކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.

ޕީޕަލްސް ނެޝަނަލް ފްރަންޓް (ޕީއެންއެފް) އިން ބޭއްވި ޖަލްސާއެއްގައި ވާހަކަދައްކަވަމުން ޔާމީން ވަނީ، ފެންނަ ނުފެންނަ ވޯޓެއް ނެގުމަކީ ހަމައެކަނި އިންތިޚާބުތައް އެއްކޮށްލައިގެން ވެރިކަމުގައި ހުރުމަށް ކުރާ ކަމަކަށް ވެގެން ނުވާނެ ކަމަށް ވިދާޅުވެފައެވެ.

ގާނޫނުއަސާސީން މަގުދައްކަނީ ހެޔޮވެރިކަމުގެ އުސޫލުތަކަށް ކަމަށް ފާހަގަކުރައްވައި ޔާމީން ވިދާޅުވީ، ރައްޔިތުންގެ މަޖިލީހުގެ އިތުރުން މިފަދަ ބޮޑެތި ނިންމުންތަކުގައި ރައްޔިތުންގެ ޚިޔާލު ހޯދުމުގެ ވޯޓަކަށް ދިއުމުގެ އިޚްތިޔާރު ރައީސުލްޖުމްހޫރިއްޔާއަށް ލިބިވަޑައިގަންނަވާ ކަމަށެވެ.

އަދި އަބޫދާބީގެ ކުންފުންޏަކަށް ރަސްމާލެ ދޫކޮށްލުމަކީ ޤައުމު ނުރައްކަލުގެ ތެރެއަށް ވައްޓާލުން ކަމަށް ސިފަކުރައްވައި، މި މުއާމަލާތުގައި އިސްކޮށް އުޅުއްވި ރައީސް ޑރ. މުހައްމަދު މުއިއްޒާއި، ހައުސިން މިނިސްޓަރު ޑރ. އަބްދުﷲ މުއްތޮލިބު އަދި ބަންޑާރަނައިބު އަހުމަދު އުޝާމް ވަނީ ޤާނޫނާ ޚިލާފުވެވަޑައިގެންފައި ކަމަށް އެމަނިކުފާނު ތުހުމަތު ކުރެއްވިއެވެ.

މި މަޝްރޫއަކީ ދިގު މުއްދަތަކަށް ދިވެހިންނަށް ފައިދާހުރި މަޝްރޫއެއް ނޫން ކަމަށާއި، މި ސަރުކާރު ނިމުމަށްފަހު އަންނަ ވަތަނީ ވެރިކަމެއްގައި މި އެއްބަސްވުން ހުއްޓުވައި، އެކަމުގައި ބައިވެރިވި ފަރާތްތަކާމެދު ގާނޫނީ ފިޔަވަޅު އަޅާނެ ކަމަށް ޔާމީން ވިދާޅުވިއެވެ.

އަދި ޤާނޫނާ ޚިލާފު އެންގުންތަކަށް ނޫނެކޭ ބުނުމަކީ ސަލާމަތީ ބާރުތަކަށް ޤާނޫނުން ލާޒިމުކުރާ ކަމެއް ކަމަށްވެސް އެމަނިކުފާނު ފާހަގަކުރެއްވިއެވެ.

ދިވެހި ސަރުކާރާއި އަބޫދާބީގެ އީގަލް ހިލްސް ކުންފުންޏާ ދެމެދު ސޮއިކުރެވުނު 20 ބިލިއަން ޑޮލަރުގެ މި މަޝްރޫއަކީ ރާއްޖޭގެ ތާރީޚުގައި ވެސް ހިންގޭ އެންމެ ބޮޑު ބޭރުގެ އިންވެސްޓްމަންޓެވެ.

ދުބާއީގައި ބޭއްވި ރަސްމިއްޔާތެއްގައި ސޮއިކުރެވުނު މި މަޝްރޫއުގެ ދަށުން 1,100 އަށްވުރެ ގިނަ ހެކްޓަރުގެ ބިން ހިއްކައި، 65,000 ހައުސިން ޔުނިޓް ގާއިމުކުރުމަށް ވަނީ ރޭވިފައެވެ.