ދައުލަތުގެ ކަންކަން ހާމަކުރުމުގައި އިދާރާތަކުން އަމިއްލައަށް އިސްނަގައިގެން މައުލޫމާތު އާންމުކުރުމަކީ ރައްޔިތުންނަށާއި މުއައްސަސާތަކަށް ލިބޭނެ އެންމެ ބޮޑު ލުއި ކަމަށް ބަޔާންކޮށް، މައުލޫމާތު ފޯރުކޮށްދިނުމުގައި ހުރި ގޮންޖެހުންތަކަށް ހައްލެއް ހޯދުމަށް އިންފޮމޭޝަން ކޮމިޝަނަރުގެ އޮފީސް (އައިކޮމް) އިން އދ. (ޔުނައިޓެޑް ނޭޝަންސް) އާއެކު މަސައްކަތް ފަށައިފިއެވެ.

ބައިނަލްއަގުވާމީ ގޮތުން ފާހަގަކުރާ މައުލޫމާތު ހޯދައި ލިބިގަތުމުގެ ހައްގުގެ ދުވަހާ ގުޅިގެން އައިކޮމްއިން ނެރުނު ބަޔާނުގައި ފާހަގަކޮށްފައިވާ ގޮތުގައި، ދައުލަތުގެ ހިންގުން ސާފުކުރުމަށް ރައްޔިތުން އެދޭ މިންވަރު އަހަރަކަށް ވުރެ އަހަރެއް އަންނަނީ އިތުރުވަމުންނެވެ. އެގޮތުން މި އަހަރުގެ މިހާތަނަށް އެ އޮފީހަށް 745 މައްސަލަ ހުށަހެޅިފައިވާއިރު، އޭގެ ތެރެއިން 260 އަށް ވުރެ ގިނަ މައްސަލަ މިހާރު ވަނީ ނިންމައިފައެވެ. މަދު މުވައްޒަފުންތަކަކާއެކު ހިންގާ އެ އޮފީހަށް ދުވާލެއްގެ މައްޗަށް އެވްރެޖުކޮށް މަދުވެގެން ހަތަރު ހުށަހެޅުން ލިބޭކަން ކޮމިޝަނުން ފާހަގަކުރެއެވެ.

އައިކޮމްއިން ބުނި ގޮތުގައި މިފަދަ ހުށަހެޅުންތައް އިތުރުވުމަކީ ހަގީގީ ކާމިޔާބީއެއް ނޫނެވެ. އޭގެ ބަދަލުގައި އެންމެ އެދެވިގެންވަނީ، އިދާރާތަކުން އިސްނަގައިގެން އަމިއްލައަށް މައުލޫމާތު ހާމަކުރަމުން ގެންދިއުމެވެ. އޭރުން މައުލޫމާތު ހޯދުމަށް އެދި ހުށަހަޅަންޖެހޭ މިންވަރު މަދުވެ، ދެފަރާތަށް ވެސް ބޮޑު ފަސޭހައެއް ލިބިގެންދާނެތީ، މިކަމަށް ޚާއްސަ ސަމާލުކަމެއް ދިނުމަށް ދައުލަތުގެ އެންމެހައި އިދާރާތަކަށް ކޮމިޝަނުން ވަނީ އިލްތިމާސްކޮށްފައެވެ.

މީގެއިތުރުން، ކޮރަޕްޝަނުން ސަލާމަތްވެފައިވާ ނަޒާހާތްތެރި ވެއްޓެއް ގާއިމުކުރުމަށް މައުލޫމާތު ހޯދުމުގެ ހައްގު މުހިންމު ދައުރެއް އަދާކުރާއިރު، ބައެއް އިދާރާތަކުން މިކަމަށް ދޭ ސަމާލުކަން އަދިވެސް ކުޑަކަން އައިކޮމްއިން ފާހަގަކުރިއެވެ. އަދި މިފަދަ ކަންކަން ދިމާވަނީ އިދާރާތަކުގައި ހުރި ދަތިތަކުގެ ސަބަބުން ކަމަށް ވެދާނެތީ، އެކަންކަން ހައްލުކޮށްދިނުމުގެ އިންތިޒާމެއް ހަމަޖެއްސުމަށް އދ. ގެ ތަރައްގީއާ ބެހޭ ޕްރޮގްރާމް (ޔޫއެންޑީޕީ) އާ ގުޅިގެން މަސައްކަތްތަކެއް ކުރަމުން އަންނަ ކަމަށްވެސް އެ ބަޔާނުގައި ވެއެވެ.

ފަސް އަހަރުގެ ދައުރަކަށްފަހު ކުރީގެ ކޮމިޝަނަރު އަހުމަދު އާހިދު ރަޝީދުގެ ދައުރު ހަމަވުމާ ގުޅިގެން، އިންފޮމޭޝަން ކޮމިޝަނަރުގެ މަގާމަށް މި މަހު ވަނީ ރާއްޖޭގެ ފުރަތަމަ އިންފޮމޭޝަން ކޮމިޝަނަރު ޢަބްދުލްޢަޒީޒު ޖަމާލް އަބޫބަކުރު އަލުން އައްޔަންކުރައްވާފައެވެ.

މައުލޫމާތު ހާމަކުރުމުގައި ހުރި ގޮންޖެހުންތަކުގެ ވާހަކަ އައިކޮމްއިން ފާހަގަކޮށްފައި މިވަނީ، ދައުލަތުގެ އިދާރާތަކުން އަމިއްލައަށް އިސްނަގައިގެން މައުލޫމާތު ހާމަނުކުރުމާއި، ގާނޫނުގެ ދަށުން މައުލޫމާތަށް އެދުމުންވެސް އެކަންކަން ހިއްސާކުރަން ދެކޮޅުހަދާ މައްސަލަތަކާމެދު އާންމުންގެ ކަންބޮޑުވުން އިތުރުވެފައިވާ ދަނޑިވަޅެއްގައެވެ.