2026 ވަނަ އަހަރުގެ ހެންލީ ޕާސްޕޯޓް އިންޑެކްސްގައި ދެކުނު އޭޝިއާ ސަރަހައްދުގެ އެންމެ ބާރުގަދަ ޕާސްޕޯޓުގެ މަގާމު ދިވެހިރާއްޖޭގެ ޕާސްޕޯޓުން އަނެއްކާވެސް ދަމަހައްޓައިފިއެވެ.

ދުނިޔޭގެ ނިސްބަތުން ބަލާއިރު ދިވެހި ޕާސްޕޯޓަށް މި އަހަރު ލިބިފައިވަނީ 52 ވަނަ ދަރަޖައެވެ. މިއީ ކުރީ އަހަރުގެ އިންޑެކްސްގައި އޮތް 53 ވަނަ ދަރަޖައާ އަޅާބަލާއިރު އެއް ދަރަޖައިގެ ކުރިއެރުމެކެވެ.

ދިވެހި ޕާސްޕޯޓު އޮންނަ ފަރާތްތަކަށް ކުރިއާލައި ވިސާ ނެގުމަކާ ނުލައި ނުވަތަ އެތެރެވާ ވަގުތު އޮން-އަރައިވަލް ވިސާގައި ދުނިޔޭގެ 92 ގައުމަކަށް ދަތުރުކުރުމުގެ ފުރުސަތު ލިބެއެވެ. މިއީ ދެކުނު އޭޝިއާގެ އެހެން އެއްވެސް ގައުމަކަށް ލިބިފައިނުވާ ވަރަށް ބޮޑު ލުއިފަސޭހައެކެވެ.

ދެކުނު އޭޝިއާގެ ސަރަހައްދީ އެހެން ގައުމުތަކަށް ބަލާއިރު، ދިވެހިރާއްޖޭގެ ފަހަތުން ދެވަނައަށް އެންމެ ބާރުގަދަ ޕާސްޕޯޓެއްގެ ގޮތުގައި އޮތީ އިންޑިއާގެ ޕާސްޕޯޓެވެ.

އިންޑިއާ އޮތީ 55 ގައުމަކަށް ވިސާއާ ނުލައި ދަތުރުކުރެވޭ ގޮތަށް އިންޑެކްސްގެ 80 ވަނައިގައެވެ. ބޫޓާން 50 ގައުމާއެކު 85 ވަނައިގައި އޮތްއިރު، ސްރީލަންކާ އޮތީ 39 ގައުމާއެކު 93 ވަނައިގައެވެ. އަދި ބަންގްލަދޭޝް 37 ގައުމާއެކު 95 ވަނައިގައި އޮތްއިރު، ނޭޕާލް އޮތީ 35 ގައުމާއެކު 96 ވަނައިގައެވެ.

2026 ވަނަ އަހަރުގެ ދުނިޔޭގެ އެންމެ ބާރުގަދަ ޕާސްޕޯޓުގެ މަގާމު ހޯދާފައިވަނީ ސިންގަޕޫރުންނެވެ.

ސިންގަޕޫރުގެ ޕާސްޕޯޓުގައި 192 ގައުމަކަށް ވިސާއާ ނުލައި ދަތުރުކުރެވެއެވެ. ދެވަނައިގައި ޖަޕާނާއި ދެކުނު ކޮރެއާ އޮތްއިރު، މި ގައުމުތަކުގެ ޕާސްޕޯޓުގައި 188 ގައުމަކަށް ވިސާއާ ނުލައި ދަތުރުކުރެވެއެވެ.