އަނިޔާވެރިގޮތަކަށް މަރާލާފައިވާ ބްލޮގަރ، ޔާމިން ރަޝީދުގެ މަރުގެ މައްސަލަ އަލުން ބަލަން ހައިކޯޓުން އަމުރު ކުރުމާ ގުޅިގެން ކްރިމިނަލް ކޯޓުން އަލުން ބަލަން ފެށި ޝަރީއަތުގެ އަޑުއެހުންތައް އެއްކޮށް ނިންމާލައިފިއެވެ.

ސ. ފޭދޫ ޗަނބޭލީގޭ އުމުރުން 29 އަހަރުގެ ޔާމީން ރަޝީދު މަރާލާފައިވަނީ 23 އޭޕްރީލް 2017 ވަނަ ދުވަހުގެރޭ 2:46 ގައި އޭނާ ދިރިއުޅެމުންދިޔަ މ. ސްޕެޓިއުލާގޭގެ ސިޑިގޮޅި ތެރޭގައި ތޫނު އެއްޗެހިން ހަމަލާ ދީގެންނެވެ. ޔާމީން ރަޝީދުގެ މަރުގެ މައްސަލާގައި ދަޢުލަތުން 6 މީހެއްގެ މައްޗަށް ގަސްދުގައި މީހަކު މެރުމުގެ ކުށުގެ ދައުވާ އުފުލިއެވެ.

ޔާމީން ރަޝީދު މަރައިލި މައްސަލައިގައި ދައުލަތުން ދައުވާ ކޮށްފައިވަނީ މ. ތާއިފް އިސްމާއިލް ރަޝީދާއި ހ. އަންނާރުމާގޭ އިސްމާއިލް ހައިޝަމް ރަޝީދާއި މ. އިރަސްމިކުގޭ އަހުމަދު ޒިހާން އިސްމާއިލާއި ގދ. ގައްދޫ ސިންދުބާދުގޭ މުހައްމަދު ދިފްރާނާއި މ. ކުދެހިގޭ ހަސަން ޝިފާޒްގެ އިތުރުން މ. ކޮޅުފުށީ އީސްޓް، ހުސައިން ޒިޔާދުގެ މައްޗަށެވެ.

ޔާމީން ރަޝީދުގެ ހަށިގަނޑުގެ 34 ތަނަކަށް ވަޅިން ހަމަލާދީ އޭނާ މަރާލިކަން ޝަރީއަތަށް ސާބިތުވާ ކަމަށް ކަނޑައަޅާފައިވަނީ ހ. އަންނާރުމާގޭ އިސްމާއީލް ހައިޝަމް ރަޝީދާއި މ. އިރާސްމިކުގޭ އަހުމަދު ޒިހާން އިސްމާއީލްގެ މައްޗަށެވެ. އަދި މ. ކޮޅުފުށީ އީސްޓް ހުސައިން ޒިޔާދާއި، މ. ތާއިފް އިސްމާއީލް ރަޝީދާއި، މ. ކުދެހިގޭ ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާންގެ މައްޗަށް ދައުވާ ކުރީ ގޯސްކޮށް ކަމަށް ކްރިމިނަލް ކޯޓުން ކުރިން ވަނީ ނިންމާފައެވެ.

ނަމަވެސް މިދިޔަ ޑިސެމްބަރު މަހު ހައި ކޯޓުން ވަނީ އެ ހުކުމް ބާތިލުކޮށް، ކުށް ސާބިތުވި ދެ މީހުންގެ ބައިގެ އިތުރުން ކުށް ސާބިތުނުވާ ކަމަށް ނިންމި މުހައްމަދު ދިފްރާން އާއި އިސްމާއިލް ރަޝީދުގެ ބައިވެސް އަލުން ބަލަން އަމުރުކޮށްފައެވެ.

މައްސަލާގައި މިއަދު ކުރިޔަށް ގެންދިޔަ އަޑުއެހުމުގައި ދައުލަތުގެ ވަކީލުން ބުނީ، ހާދިސާ ހިނގި ރޭ އިސްމާއިލް ރަޝީދު އެގޭ ކައިރީގައި ސައިކަލުގައި މަޑުކޮށް، ހަމަލާދިން މީހުން ފިލުވުމުގައި އެހީތެރިވެ ދީފައިވާކަން ހެކިންގެ ބަހުން އެނގޭ ކަމަށެވެ. އަދި ޔާމީން ރަޝީދު މަރާލުމަށް ރޭވި ރޭވުމުގައި އޭނާ ބައިވެރިވި ކަމަށާއި، ދިފްރާން ޔާމީނަށް ފާރަލުމުގައި ހަރަކާތްތެރިވި ކަމުގެ ހެކި ހުރުމުން އެ ދެ މީހުންގެ މައްޗަށް ކުށް ސާބިތުވާ ކަމަށް ކަނޑައަޅައި ދިނުމަށް ދައުލަތުން އެދުނެވެ.

ނަމަވެސް ދިފާއީ ވަކީލު ވިދާޅުވީ ދައުލަތުން ހުށަހެޅި ވީޑިއޯ ފުޓޭޖް ނުސާފުވުމުގެ އިތުރުން ސިއްރު ހެކިންގެ ހެކިބަހަކީ އިތުބާރު ހިފޭ އެއްޗެއް ނޫން ކަމަށާއި، ހެކިން ވާހަކަ ދައްކާފައިވަނީ ހީއެއްގެ މައްޗަށް ކަމަށެވެ. އެހެންކަމުން ދެ މީހުންގެ މައްޗަށް ކުށް ސާބިތުނުވާކަމަށް ނިންމައިދިނުމަށް ދިފާއުން އެދުނެވެ.

މިއަދުގެ އަޑުއެހުން ނިންމާލަމުން މައްސަލައިގެ ބެންޗުގެ އިސް ޤާޟީ އިބްރާހިމް އިހްސާން ވަނީ ދެން އޮންނާނީ އަލުން މައްސަލަ ބެލި ހަތަރު މީހުންގެ މައްޗަށް އެކުގައި ހުކުމް އިއްވުން ކަމަށް އިޢުލާނު ކުރަށްވާފައެވެ.