މަސް ދުވަހުގެ ޗުއްޓީއަކަށް ފަހު ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ ޖަލްސާތައް އަންނަ ހޯމަ ދުވަހު ފެށުމަށް ތާވަލުކޮށްފިއެވެ.

މަޖިލީހުގެ އިދާރާއިން ބުނީ، ހޯމަ ދުވަހު ބާއްވާ މި ދައުރުގެ ފުރަތަމަ ޖަލްސާގެ އެޖެންޑާގައި މުހިންމު މަސައްކަތްތަކެއް ހިމަނާފައިވާ ކަމަށެވެ. އެގޮތުން، ކުށްކޮށްގެން ހޯދާ މުދަލާ ގުޅޭ ބިލުގެ ބަހުސް ކުރިއަށް ގެންދިއުން އެ ދުވަހުގެ އެޖެންޑާގައި ވަނީ ހިމަނައިފައެވެ.

މަޖިލީހުގެ ޖަލްސާއެއް އެންމެ ފަހުން ބާއްވާފައިވަނީ މިދިޔަ އޮގަސްޓް މަހުގެ 26 ވަނަ ދުވަހުއެވެ. ރައްޔިތުންގެ މަޖިލީހުގެ ގަވާއިދު ބަޔާންކުރާ ގޮތުގައި، ކޮންމެ އަހަރަކު ވެސް މަޖިލީހުގެ އާންމު ޖަލްސާތައް ބާއްވަނީ ތިން ދައުރަކަށް ބަހާލައިގެންނެވެ.

މަޖިލީހުގެ ދައުރުތައް ބެހިގެންވަނީ، ފެބްރުއަރީ މަހުގެ 1 ވަނަ ދުވަހުން ފެށިގެން މެއި މަހުގެ 15 ވަނަ ދުވަހުގެ ނިޔަލަށް ފުރަތަމަ ދައުރު، ޖޫން މަހުގެ 1 ވަނަ ދުވަހުން ފެށިގެން އޮގަސްޓް މަހުގެ 15 ވަނަ ދުވަހުގެ ނިޔަލަށް ދެވަނަ ދައުރު، އަދި އޮކްޓޯބަރު މަހުގެ 1 ވަނަ ދުވަހުން ފެށިގެން ނޮވެމްބަރު މަހުގެ ނިޔަލަށް ތިންވަނަ ދައުރެވެ.

މަޖިލީހުގެ ރައީސް ޢަބްދުއްރަޙީމް ޢަބްދުﷲ ގެ ރިޔާސަތުގެ ދަށުން ކުރިއަށްދާ ވިހިވަނަ ރައްޔިތުންގެ މަޖިލީހުގެ ތިންވަނަ ދައުރު ފެށޭއިރު، ސަރުކާރުން ހުށަހަޅާފައިވާ މުހިންމު ގިނަ ބިލުތަކަކާއި ރައްޔިތުންނާ ގުޅުންހުރި މުހިންމު މައްސަލަތަކެއްގެ ބަހުސް މި ދައުރުގައި ކުރިއަށްދާނެ ކަމަށް ބެލެވެއެވެ.