އިންޑިއާގެ ނިއު ދިއްލީގެ ޖަންތަރު މަންތަރުގައި ކުރިއަށްދިޔަ މުޒާހަރާއެއްގެ ތެރެއިން ސަލާމަތީ ބާރުތަކުން ހައްޔަރުކުރި މީހުންގެ ތެރޭގައި ހިޖާބު އަޅައިގެން ހުރި މުސްލިމް އަންހެނަކު ހިމެނޭ ކަމަށް ރޯޔާ ނިއުސްއިން ރިޕޯޓުކޮށްފިއެވެ.

މި މުޒާހަރާއަކީ އިންޑިއާގެ އިލެކްޝަން ކޮމިޝަނުން އެންމެ ފަހުން ވޯޓަރުންގެ ލިސްޓު އިސްލާހުކުރުމުގެ ތެރޭގައި ރަޖިސްޓްރީވެފައިވާ ގިނަ އަދަދެއްގެ ވޯޓަރުންގެ ނަންތައް އުނިކޮށްފައިވާ ކަމަށް ބުނެ، އިދިކޮޅު އެކްޓިވިސްޓުންނާއި ޒުވާނުންގެ ގުރޫޕުތަކުން އިސްނަގައިގެން، ޗީފް އިލެކްޝަން ކޮމިޝަނަރު ކުމާރުގެ އިސްތިއުފާއަށް އެދި ކުރިއަށްގެންދިޔަ ހަރަކާތެކެވެ.

މުޒާހަރާގެ ބައިވެރިން ކަންބޮޑުވުން ފާޅުކުރަމުން ދަނިކޮށް، ސަލާމަތީ ބާރުތަކުން ވަނީ މުޒާހަރާގެ މައި ސަރަހައްދުން ގިނަ އަދަދެއްގެ މީހުން ހައްޔަރުކޮށް، ފުޅާ ދާއިރާއެއްގައި ކްރެކްޑައުންއެއް ހިންގާފައެވެ.

މި ހަރަކާތުގެ ތެރެއިން އެކި އެކްޓިވިސްޓުންގެ އިތުރުން ހިޖާބު އެޅި މުސްލިމް އަންހެން މީހާވެސް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

މީގެއިތުރުން، ފުލުހުންގެ ހަރަކާތްތަކާ މެދު ބޮޑެތި ތުހުމަތުތަކެއް ވަނީ ފެންމަތިވެފައެވެ.

ރޯޔާ ނިއުސްއިން ބުނެފައިވާ ގޮތުގައި، މުޒާހަރާގެ ތެރެއިން ފުލުހުން އަމަލުކުރި ގޮތުން ޖިންސީ ގޯނާގެ ޝަކުވާ ހުށަހެޅި އަންހެން ތިން ނޫސްވެރިއަކުވެސް ހިމެނެއެވެ. މި ތުހުމަތުތަކާ ގުޅިގެން ދިއްލީ ފުލުހުން ވަނީ އެފަދަ ޝަކުވާތަކެއް ލިބިފައިވާކަން ކަށަވަރުކޮށްދީ، ހާދިސާ ހިންގި ސަރަހައްދުގައި ހަރަކާތްތެރިވި އޮފިސަރުންގެ އަމަލުތަކާ މެދު އިންސާފުވެރި ތަހުގީގެއް ހިންގާނެ ކަމަށް ބުނެފައެވެ.