ރިސޯޓެއްގެ ގޮތުގައި ތަރައްޤީކުރާ ކ. ރަށްފަޅުހުރާއިން 26 މީހުން ޕޮޒިޓިވްވެފައިވާ ކަމަށް އެޗްއީއޯސީން ހާމަކޮށްފިއެވެ.

ހެލްތް އިމާޖަންސީ އޮޕަރޭޝަން ސެންޓަރުން ބުނީ ހަދަމުންދާ ރިސޯޓްތަކާއި އޮޕަރޭޝަންގައި ހުރި ރިސޯޓްތަކުގައި ބަލި ފެތުރެމުން ނުދާކަން ކަށަވަރު ކުރުމަށް ރެންޑަމް ސާމްޕަލް ނެގުމުގެ މަސައްކަތް ކުރަމުންދާ ކަމަށާއި، އެގޮތުން މި ވަގުތު ކުރަމުން ގެންދަނީ ހަދަމުންދާ ރިސޯޓްތަކުން ސާމްޕަލް ނެގުމުގެ މަސައްކަތް ކަމަށެވެ.

އެގޮތުން ކ. ރަށްފަޅު ހުރާއިން 249 ސާމްޕަލް ނަގާފައިވާއިރު، އޭގެ ތެރެއިން 26 ސާމްޕަލް ޕޮޒިޓިވް ވެފައިވާ ކަމަށް އެޗްއީއޯސީން ވަނީ ބުނެފައެވެ. އެޗްއީއޯސީން ބުނީ ރަށްފަޅު ހުރާ ތަރައްޤީ ކުރުމުގެ ޕްރޮޖެންޓްގައި 2000 މީހުން މަސައްކަތް ކުރަމުން ގެންދާ ކަމަށާއި، ޕޮޒިޓިވް ކޭސްތަކާއި ގުޅިގެން ކޮންޓެކްޓް ޓްރޭސިންގެ މަސައްކަތް މިހާރު ކުރަމުންދާ ކަމަށެވެ.

ސިންގަޕޫރުގެ ޕޮންޓިއާކް ކުންފުނިން ތަރައްޤީކުރާ ދަ ރިޓްޒް ކާލްޓަން މޯލްޑިވްސް ފަރި އައިލެންޑުގައި މަތީ ފަންތީގެ އެންމެ ޒަމާނީ ވަސީލަތްތައް ހިމެނޭ ގޮތަށް 90 ވިލާ ހުންނާނެ އެވެ. ރަށްފަޅު ހުރާ ފަޅު ތަރައްގީ ކުރަނީ އިންޓަގްރޭޓެޑް ޓޫރިޒަމް ޑެސްޓިނޭޝަނެއްގެ ގޮތުގަ އެވެ. މުޅި މި މަޝްރޫއުގެ އަގު ގާތްގަނޑަކަށް 500 މިލިއަން ޑޮލަރަށް އަރާއިރު، އެ ރަށުގައި ތަފާތު ތިން ގިންތިއެއްގެ ރިސޯޓުތައް ހިންގާނެ އެވެ. މި މަޝްރޫއު ފަށާފައިވަނީ 2017 ވަނަ އަހަރު އެވެ.

ރާއްޖެއިން މިހާތަނަށް 12204 މީހަކަށް ވަނީ ކޯވިޑް-19 ޖެހިފައެވެ. އޭގެ ތެރެއިން 11289 މީހުން ވަނީ ރަނގަޅުވެފައެވެ. އަދި މިހާތަނަށް ކޮވިޑް ޖެހިގެން 43 މީހަކު ވަނީ މަރުވެފައެވެ.