ރައްޔިތުންގެ މަޖިލީހަށް ކޯޓުފަޓުލޫންގައި ހާޒިރުވާ ސަބަބު ކާށިދޫ ދާއިރާގެ މެމްބަރު އަބްދުﷲ ޖާބިރު ހާމަކޮށްދެއްވައިފިއެވެ.

ރޭޑިއޯއިން ގެނެސްދިން ޕްރޮގްރާމެއްގައި ވާހަކަދައްކަވަމުން ޖާބިރު ވިދާޅުވީ، އޭނާއަކީ ޔޫރަޕުގައި ވަރަށް ގިނައިން އުޅުއްވާ ބޭފުޅެއްކަމަށާއި، އޭނާއަށް ދަސްވެފައިވަނީ ތަހުޒީބީ އުޅުމެއް ކަމަށެވެ. އަދި އޭނާއަށް ކޯޓްލައިގެން އުޅެން ވަރަށް ފަސޭހަކަމަށްވެސް ޖާބިރު ވިދާޅުވިއެވެ.

ޖާބިރު ވިދާޅުވީ ރާއްޖޭގެ އެންމެ ގަދަރުވެރި މަޖިލީހުގައި އިންނައިރު ކޯޓް ނުލާންވީ ސަބަބެއް ނެތްކަމަށެވެ.

"އަޅުގަނޑަށް ވަރަށް ކޮމްފޮރޓަބަލް، އަޅުގަނޑަކީ ޔޫރަޕުގައި އުޅޭ މީހެއް. ތަހުޒީބު ގައުމުތަކުގައި އުޅޭއިރު. ގައިންގަޔަށް ކަންތައްތައް ކުރަންޖެހޭ. ރީތިކޮށް ޑްރެސް ކުރަން ޖެހޭ. އަޅުގަނޑަށް ކަމަކުނުދޭ މިރާއްޖޭގެ އެންމެ މަތީ މަޖިލީހުގައި އިންނައިރު ކޯޓެއް ނުލާންވީ ސަބަބެއް ނެތް. އަޅުގަނޑު ކޮންމެ ތާކަށް ވެސް ދަނީ ކޯޓް ލައިގެން. ޔޫރަޕްގައި އިޓަލީގައި ވަރަށް ދުވަހު އުޅުނިން. އަބަދުވެސް ކޯޓް ލައިގެން އަޅުގަނޑު އުޅެނީ. ކޯޓު ނުލާ ދުވަސްވަރެއް ހަނދާނެއް ނެތް. ބައިވަރު ކޯޓް ހުންނާނެވެސްމެ. ގިނަ މެމްބަރުން ވަނީ ކޯޓް ލާން. އެކަމަކު ލަދުން އެމީހުން ނުލަނީ." މަޖިލީހަށް ކޯޓް ތުރުކުރައްވައިގެން ވަޑައިގަންނަވާ ސަބަބު ހާމަކުރައްވަމުން ޖާބިރު ވިދާޅުވިއެވެ.

ޖާބިރު ވިދާޅުވީ ރައްޔިތުންނަށް ހިދުމަތް ކުރައްވާ ބޭފުޅުން ތިއްބަވަންޖެހޭނީ ކޯޓްލައިގެން ކަަމަށާއި، އެއީ ކުރާ މަސައްކަތުގެ ސީރިއަސްކަން އަންގައިދޭ ކަމެއްކަމަށެވެ.

"ވަޒީރުންގެ މަޖިލިސްވެސް އޮންނަންވާނީ ކޯޓް ލައިގެން. ރީތިކޮށް ތިބެންވާނީ. އެއީ ރައްޔިތުންނަށް ގަދަރުކުރުމަށް ކުރާ މަސައްކަތުގެ ސީރިއަސްކަން އަންގައިދިނުމަށް. ކޮންމެ ދުވަހަކު މަޖިލިހަށް ގޮސް، ކޮފީ މެޝިން ހުސްވަންދެން ކޮފީ ބޮއެފައި، ސިނގިރޭޓް ބުއީމަ ނިމުނީ އެއް ނޫން." ޖާބިރު ވިދާޅުވިއެވެ.

ޖާބިރު ކޯޓްލައިގެން މަޖިލީހަށް ހާޒިރުވާ ސަބަބު ހާމަކުރައްވާފައިވާއިރު، އޭނާއަކީ މަޖިލިސް ރިޔާސަތުގައި އިންނަވާ ބޭފުޅާ ފިޔަވައި މަޖިލިހަށް ކޯޓް ލައިގެން ހާޒިރުވާ ހަމައެކަނި މެމްބަރެވެ.