މިއަހަރު ރާއްޖެއިން ޗައިނާއަށް ދައްކަން ޖެހެނީ 1،719،535 ޑޮލަރުކަމަށް ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު، ޒާން ލިޒޮންގ ވިދާޅުވެއްޖެއެވެ.

ޗައިނާގެ ސަފީރު މިހެން ވިދާޅުވެފައި މިވަނީ ރައީސް ނަޝީދު އިއްޔެގެ ވަގުތެއްގައި ޗައިނާގެ ލޯނުތަކާބެހޭ ގޮތުން ކުރަށްފައިވާ ޓްވީޓަކާ ގުޅިގެންނެވެ.

ރައީސް ނަޝީދުގެ ޓްވީޓުގައި ވިދާޅުވެފައިވަނީ، ކުރިއަށް އޮތް 14 ދުވަސްތެރޭ ރާއްޖެއިން ޗައިނާއަށް 15 މިލިއަން ޑޮލަރު ދައްކަންޖެހޭ ކަމަށާއި، ޗައިނާގެ ބޭންކް ތަކުން މިކަމުގައި ސަރުކާރަށް މިހާތަނަށް އެއްވެސް ލުޔެއް ދީފައި ނެތް ކަމަށެވެ. އަދި މިއީ ކުރިޔަށް އޮތް 14 ދުވަހު ދަޢުލަތަށް ލިބޭ ޢާމްދަނީގެ 50 އިންސައްތަ އަށްވުރެ ބޮޑު ޢަދަދެއް ކަމަށެވެ.

ނަމަވެސް މިކަން ދޮގުކުރައްވާ ރައީސް ނަޝީދުގެ ވާހަކަތަކަށް ޗައިނާ ސަފީރު ރައްދު ދެއްވާ ވިދާޅުވެފައި ވަނީ ބޭންކްތަކުގެ މަޢުލޫމާތަށް ބަލާއިރު، 14 ދުވަސް ތެރޭގައި ރާއްޖެއިން ޗައިނާއަށް ދައްކަންޖެހޭ 15 މިލިއަން ޑޮލަރުގެ ޕޭމެންޓެއް ނެތް ކަމަށެވެ.

އަދި މިކަމާ ގުޅޭގޮތުން އިތުރު މަޢުލޫމާތު ހާމަކުރައްވަމުން ޗައިނާ ސަފީރު މިއަދު ވިދާޅުވީ މިއަހަރު ރާއްޖެއިން ޗައިނާއަށް ދައްކަން ޖެހެނީ 1،719،535 ޑޮލަރުކަމަށެވެ. އަދި މިއީ ހޯމް ވޯކް ހެދުމަށްފަހު އާންމު ކޮށްފައިވާ އަދަދުތަކެއްކަމަށްވެސް ޗައިނާ ސަފީރު ވިދާޅުވެފައިވެއެވެ.

މީގެ އިތުރުން ޗައިނާ ސަފީރު ވިދާޅުވެފައިވަނީ ހުޅުމާލޭގެ ފޭސް 2 ގެ 1530 ހައުސިންގ ޔުނިޓް ތަަަރައްގީކުރުމަށް ނަގާފައިވާ 2،375،000 ޑޮލަރުގެ ލޯނަކީ ޗައިނާގެ ބޭންކް ތަކުން ނަގާފައިވާ ލޯނެއް ނޫން ކަމަށެވެ.

އަދި ސްޓެލްކޯގެ ޕްރޮޖެކްޓްތަކަށް ނަގާފައިވާ ލޯނު ދައްކަން ޖެހޭނީ މިއަންްނަ އަހަރު ޖެނުއަރީ މަހު މެދުތެރޭގައި ކަމަށްވެސް ޗައިނާގެ ސަފީރު ވިދާޅުވެފައިވެއެވެ.

މިކަމާ ގުޅޭ ލިޔުންތަކާއެކު ޗައިނާ ސަފީރު ޓްވީޓް ކުރށްފައިވާއިރު، ލޯނާ ބެހޭގޮތުން ޗައިނާ ސަފީރު ދައްކަވަމުންދާ ވާހަކަތައް ރަސްމީ ސިޓީފުޅެއްގައި ރާއްޖޭގެ ސަރުކާރަށް ފޮނުއްވާ ދެއްވުމަށް މިނިސްޓްރީ އޮފް ފިނޭންސް އެންޑް ޓްރެޝަރީގެ ޑިރެކްޓަރ އިސްމާޢީލް ޒަރިޔަންދު ވަނީ އެދިވަޑައިގެންފައެވެ.

ޗައިނާއަށް ދައްކަންޖެހޭ ލޯނު ތަކާބެހޭގޮތުން ރައީސް ނަޝީދު ދައްކަވާ ވާހަކައާއި ޗައިނާ ސަފީރުގެ ވާހަކަތައް މިފަހަރުވެސް މިވަނީ ވަރަށް ބޮޑަށް ތަފާތުވެފައެވެ.

ޒަރިޔަންދު މިކަމަށް އެދިވަޑައިގެންފައިވަނީ ރައީސް ނަޝީދާއި ޗައިނާ ސަފީރު ރާއްޖެއިން ޗައިނާއަށް ދައްކަންޖެހޭ ލޯނާއިމެދު ޓްވިޓަރގައި ވަރުގަދަ ބަހުގެ ހަމަލާ ތަކެއް ބަދަލު ކުރައްވަމުން ގެންދަވަނިކޮށެވެ.

ރާއްޖޭގެ ތަރައްގީގެ ގިނަ މަޝްރޫޢުތައް ހިންގުމަށްޓަކައި ޗައިނާ މެެދުވެރިކޮށް ރާއްޖެއިން އެއް ބިލިއަން ޑޮލަރަށް ވުރެ ބޮޑު އަދަދަަކަށް ލޯނު ނަގާފައިވެއެވެ. އަދި ޗައިނާގެ އެކި ބޭންކްތަކަށް ރާއްޖެއިން ދައްކަންޖެހޭ ލޯންތައް ބޮޑުވެ އެ އަދަދު ނުދެއްކޭނެ ކަމަށްވެސް ރައީސް ނަޝީދު ވަނީ މީގެ ކުރިން ވިދާޅުވެފައެވެ. ޗައިނާއިން ނަގާފައިވާ ލޯނުތަކާ ގުޅިގެން ދޭތެރެ ދޭތެރެއިން ރައީސް ނަޝީދާއި ޗައިނާ ސަފީރު ޓްވިޓަރގައި ޒުވާބު ކުރަށްވަމުން ގެންދަވައެވެ.