އެމްއާރުއެމްގެ ސްލޮޓެއްގައި ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ކަމުގައި ހުންނެވި ޝިމާޒް އަލީ އަށް ޓެންޑަ ބޯޑުގައި އާއްމުން ތަމްސީލްކުރައްވާ މެމްބަރު، އިސްމާއިލް ޒަރިޔަންދު ކުރަށްވާ ކޮރަޕްޝަންގެ ތުހުމަތުތަކުގެ ތަފްސީލް ހިއްސާކޮށްދެއްވަން ކުރީގެ ރައީސް އަދި އެމްއާރުއެމްގެ ރައީސް މައުމޫން އަބްދުލްގައްޔޫމް އެދިވަޑައިގެންފި އެވެ.

ޒަރިޔަންދު، ކުރެއްވި ޓުވީޓެއްގައި ވިދާޅުވީ ޓްރާންސްޕޯޓް މިނިސްޓްރީގައި އެމްއާރުއެމްގެ ސްލޮޓެއްގައި ހުންނެވި ޑެޕިއުޓީ މިނިސްޓަރުގެ އަމަލުތަކުން، ދައުލަތުގެ ގަވާއިދުތަކަށް ގޮންޖަހައި ކޮރަޕްޝަނަށް މަގުފަހިވާ ގޮތަށް ކަންކަން ކުރާ ކަން ހާމަވަމުންދާ ކަމަށެވެ. އެ މަރުހަލާގައި، އޭނާއާ މެދު ގޮތެއް ނިންމައިދޭން ވެސް އެދިވަޑައިގެންފައިވެ އެވެ.

ތިޔަވިދާޅުވާމައްސަލައިގެ ތަފުޞީލު އެމްއާރްއެމްގެއޮފީހަށްފޮނުއްވައިދެއްވުން އެދެން. https://t.co/TaJCMoIRBE

— Maumoon Abdul Gayoom (@maumoonagayoom) December 22, 2020

އޭނާއަށް ދެއްވި ރައްދުގައި ރައީސް މައުމޫން އެދިވަޑައިގަތީ ޒަރިޔަންދު ވިދާޅުވި މައްސަލައިގެ ތަފްސީލް އެމްއާރުއެމްގެ އޮފީހަށް ފޮނުއްވައިދެއްވުމަށެވެ.

އެމްއާރުއެމް އަބަދުވެސް ދެމިއޮންނަންވާނީ އަދި މަސައްކަތް ކުރަން ޖެހޭނީ ވެސް ކޮރަޕްޝަނާއި އަނިޔާއާ ދެކޮޅަށް ކަމަށް އެ ޕާޓީގެ މެމްބަރުންނާ އެންމެ ފަހުން ބައްދަލުކުރެއްވި ޖަލްސާގައި ވެސް ރައީސް މައުމޫން ވަނީ ވިދާޅުވެފަ އެވެ.

މަގާމުގެ ނުފޫޒުން ނާޖާއިޒު ފައިދާ ހޯދައިދިން ކަމުގެ ތުހުމަތު ޝިމާޒަށް ކުރަނީ ރާއްޖޭގައި ދުއްވާ ހުރިހާ ވެހިކަލްތަކުގެ ނަމްބަރު ޕްލޭޓް ބަދަލުކުރަން ވަސާޖިއޯ ނަމަކަށް ކިޔާ ކުންފުންޏާ ހަވާލުކުރި މައްސަލައިގަ އެވެ. ރާއްޖޭގައި ދުއްވާ 120،000 ވެހިކަލްގެ ނަމްބަރު ޕްލޭޓް ބަދަލުކޮށްގެން އެ ކުންފުންޏަށް 68 މިލިއަނަށް ވުރެ ގިނަ ރުފިޔާ ލިބޭނެ ގޮތަށް އަދި އޭގެ ފަހުން ވެސް އެ ކުންފުންޏަށް އެ މަސައްކަތުން ފައިދާވާ ގޮތަށް އެކުންފުންޏާ މަސައްކަތް ހަވާލުކުރީ އެންމެ އަގުހެޔޮކޮށް ހުށަހެޅި ކުންފުނީގެ ބީލަން ބާތިލްކުރުމަށް ފަހުގައި ކަމަށް ތުހުމަތުކޮށްފައި ވެއެވެ. މިތުހުމަތު ކުރާ ފަރާތްތަކުން ބުނަނީ އެންމެ ކުޑަ އަގު ހުށައެޅި ފަރާތުގެ ބީލަން ބާތިކުރީ ބީލަމުގައި ހިމަނަން ޖެހޭނެ ކަމަށް އިއުލާންގައި ބުނެފައި ނެތް ލިއުމެއް ހުށަހަޅާފައި ނުވާތީ ކަމަށް ބުނެއެވެ.