މިދިޔަ އާދީއްތަ ދުވަހު ބޭއްވި ކައިވެނި ހަފްލާއަށް ދިޔަ އިތުރު ހަ މީހަކު ކޯވިޑް-19 އަށް ޕޮޒިޓިވްވެ، އެ ކްލަސްޓަރގެ ޖުމްލަ 41 އަށް އަރައިފިއެވެ.

އެޗްޕީއޭ އިން މީގެ ކުރިން ބުނީ މިދިޔަ އާދީއްތަ ދުވަހު ޝީ ބިލްޑިންގައި ބޭއްވި ކައިވެނީގެ ހަފްލާއަކަށް ދިޔަ 35 މީހަކު ކޮވިޑަށް ޕޮޒިޓިވްވެފައިވާ ކަމަށެވެ. ކައިވެނި ހަފްލާއާ ގުޅިގެން އެންމެ ފުރަތަމަ މީހެއް ޕޮޒިޓިވްވީ މިމަހުގެ 24 ވަނަ ދުވަހުއެވެ. އަދި އޭގެ ފަހުން މިހާތަނަށް 41 މީހަކު ޕޮޒިޓިވްވެފައިވާ ކަމަށް އެޗްޕީއޭ އިން މަޢުލޫމާތުދެއްވައެވެ.

"މި ކްލަސްޓާގައި މިހާތަނަށް 41 ކޭސް އަޅުގަނޑުމެންނަށް ފެނިފައިވޭ. ފުރަތަމަ ޑިސެންބަރު މަހުގެ 24 ވަނަ ދުވަހު އެއް ކޭސް ޕޮޒިޓިވްވެފައި މިވަނީ. އަދި 25 ވަނަ ދުވަހު 12 ކޭސް، 26 ވަނަ ދުވަހު 21 އަދި މިއަދު 27 ޑިސެންބަރުގައި މިހާތަނަށް 8 ކޭސް،" ޑރ. ނަޒްލާ ވިދާޅުވިއެވެ.

އެ ކްލަސްޓަރ އިން މިހާތަނަށް 116 މީހުން ކޮންޓެކްޓުންގެ ގޮތުގައި ފާހަގަކުރެވިފައިވާ ކަމަށާއި، އަދި ޕޮޒިޓިވް މީހުންގެ ތެރޭގައި ހައި ރިސްކް ކެޓެގަރީގެ ހަތަރު މީހަކު ހިމެނޭ ކަމަށްވެސް ނަޒްލާ ވިދާޅުވިއެވެ. އެޗްޕީއޭ އިން ވަނީ، މިފަދަ ހަފްލާތައް ބާއްވާއިރު އެޗްޕީއޭގެ ގައިޑްލައިންތަކާ އެއްގޮތަށް އަމަލުކުރުމަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ.

އެޗްޕީއޭގެ ތަފާސް ހިސާބުތައް ދައްކާގޮތުން ރާއްޖެއިން ބަލިޖެހުނު މީހުންގެ ޖުމްލަ އަދަދު މިހާރު ވަނީ 13،644 އަށް އަރާފައެވެ. މިހާތަނަށް ރާއްޖެއިން ބަލިޖެހުނު މީހުންގެ ތެރެއިން 13،072 މީހުންވަނީ ބަލިން ރަނގަޅުވެފައެވެ. އަދި ކޮވިޑް ޖެހިގެން މިހާތަނަށް ރާއްޖޭގައި ނިޔާވި މީހުންގެ އަދަދު ވަނީ 48 އަށް އަރާފައެވެ.