ރާއްޖެއަށް މި ބިންދައިލީ ކޮވިޑުގެ ތިންވަނަ ރާޅެއް ކަމަށާއި ޚިޔާލު ތަފާތުވުން އެއްކިބާކޮށް ގުޅިގެން މަސައްކަތް ކޮށްފި ނަމަ މިފަހަރުވެސް ކާމިޔާބު ލިބޭނެ ކަމަށް ޑރ. މުހައްމަދު އަލީ ވިދާޅުވެއްޖެއެވެ.

ޑރ. މުހައްމަދު އަލީ މިމެސެޖް އާންމުކުރަށްވައި އެންމެހައި ރައްޔިތުން ގުޅިގެން ތިންވަނަރާޅުން ސަލާމަތް ވުމަށް މަސައްކަތް ކުރުމަށް އިލްތިމާސް ކުރަށްވާފައިވާއިރު މިހާރު ދުވާލެއްގެ މައްޗަށް ދިވެހި ރާއްޖޭގައި ކޮވިޑު ޖެހޭ މީހުންގެ އަދަދު ވަނީ 200 އިން މައްޗަށް އަރާފައެވެ. އަދި ރާއްޖޭގެ އެކި ސަރަހައްދު ތަކުގައި ބަލި ފެތުރެން ފަށާފައިވާކަން ވެސް ފާހަގަ ކުރެވެއެވެ.

އެޗްޕީއޭގެ އެންމެ ފަހުގެ ތަފާސް ހިސާބު ދައްކާގޮތުގައި ރާއްޖެއިން އިއްޔެ ވަނީ 215 މީހުން ކޮވިޑަށް ޕޮޒިޓިވްވެފައެވެ. މިއީ މިފަހުގެ ތާރީހެއްގައި މިހާ ގިނަ އަދަދެއްގެ ބަޔަކު ރާއްޖެއިން ޕޮޒިޓިވްވި ފުރަތަމަ ފަހަރެވެ.

It’s a third wave of #COVID19 in #Maldives.

All of us together can fight it once again.

Don’t lose hope,don’t blame each other.

Lets stand together. whether we have different opinions on other things, let us focus and work towards a single goal to flatten the curve once again.

— Dr. Mohamed Ali (@Moxamedalu) February 1, 2021

މިކަމާ ގުޅިގެން ޑރ. މުހައްމަދު އަލީ ވިދާޅުވެފައިވަނީ ރާއްޖެއަށް ކޮވިޑުގެ ތިންވަނަ ރާޅެއް އަރައިފިކަމަށެވެ. އަދި މިފަހަރުވެސް ބަލި ކޮންޓްރޯލްކޮށް އަދަދުތައް މަދުކުރެވޭނީ އެންމެން އެކުގައި މަސައްކަތް ކުރުމުންކަމަށް ޑޮކްޓަރ ވަނީ ވިދާޅުވެފައެވެ. އަދި މިދަނޑިވަޅަކީ އެކަކު އަނެކެއްގެ ބޮލުގައި އިލްޒާމު އަޅުވައި އުންމީދު ކަނޑައިލަންވީ ވަގުތު ނޫންކަމަށްވެސް ޑރ. މުޙައްމަދު ޢަލީ ވިދާޅުވެފައިވެއެވެ.

މީގެ އިތުރުން ހިޔާލު ތަފާތުވިނަމަވެސް އެކުގައި ކޮވިޑުން ރައްކާތެރިވުމުގައި އެންމެން އެއްއަމާޒަކަށް މަސައްކަތް ކުރުމުގެ ރޫހް އަށަގެންނެވުމަށް ޑރ. މުހައްމަދު އަލީ އިލްތިމާސް ކުރައްވާފައި ވެއެވެ.