ޗައިނާއިން އިތުރު އެއްލައްކަ ޑޯޒް ވެކްސިން ރާއްޖެއަށް ހަދިޔާ ކުރުމަށް ނިންމާފައިވާކަމަށް ރާއްޖޭގައި ހުންނަވާ ޗައިނާގެ ސަފީރު ޒާން ލިއޮން ވިދާޅުވެއްޖެ އެވެ.

ސަފީރު މިހެން ވިދާޅުވީ ފޮރިން މިނިސްޓަރު އަބްދުﷲ ޝާހިދާއެކު މިއަދު ބޭއްވެވި ބައްދަލުވުމަކަށް ފަހުއެވެ. މިދިޔަ މަހުގެ ހަތަރުވަނަ ދުވަހުވެސް ޗައިނާއިން ވަނީ ރާއްޖެއަށް އެއްލައްކަ ޑޯޒް ވެކްސިން ދޭނެ ކަމަށް އިއުލާނު ކޮށްފައެވެ. ނަމަވެސް އެ ވެކްސިން އަދި ރާއްޖެއަށް ގެނެސްފައެއް ނުވެއެވެ. އަދި ޗައިނާގައި އުފައްދާ ވެކްސިން ރާއްޖޭގައި ބޭނުންކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީން ހުއްދަ ދީފައެއްވެސް ނުވެއެވެ.

To support 🇲🇻 Gov. for its economic recovery, fulfill China's promise to make vaccines public goods, and for ppl to ppl friendship, China decided to donate new bat. of 100k vaccines to 🇲🇻besides the 1st round of 100k vaccines announced. @ibusolih @abdulla_shahid @MohamedNasheed pic.twitter.com/yLWPx4THQC

— Amb. Zhang Lizhong (@AmbassadorZhang) March 4, 2021

ސަފީރު މިއަދު ވިދާޅުވީ ކުރިން އިއުލާނުކުރި އެއްލައްކަ ޑޯޒް ވެކްސިންގެ އިތުރުން އިތުރު އެއްލައްކަ ޑޯޒް ވެކްސިން ރާއްޖެއަށް ހަދިޔާކުރުމަށް ނިންމާފައިވާ ކަމަށެވެ. މިއާއެކު ޗައިނާއިން ރާއްޖެއަށް ހަދިޔާ ކުރިކަމަށް އިޢުލާނުކުރި ވެކްސިންގެ ޢަދަދު ވަނީ ދެލައްކަ އަށް އަރާފައެވެ.

ރާއްޖޭގައި މިހާރު ބޭނުންކުރަމުންދަނީ އޮކްސްފަރޑް ޔުނިވަރސިޓީއާއި އެސްޓްރާޒެނެކާ ގުޅިގެން ތައްޔާރުކޮށްފައިވާ "އޮކްސްފަރޑް-އެސްޓްރާޒެނެކާ ވެކްސިން،" ގެ މައްޗަށް ބިނާކޮށް ސިރަމް އިންސްޓިޓިއުޓް އޮފް އިންޑިއާއިން "ކޮވިޝީލްޑް" ބްރޭންޑްގެ ނަމުގައި އުފައްދާފައިވާ ވެކްސިނެވެ. އިންޑިއާ ސަރުކާރުގެ އެހީތެރިކަމާއެކު އެ ޤައުމުން ވަނީ މި ވެކްސިންގެ 200000 ޑޯޒް ރާއްޖެއަށް ހަދިޔާކޮށްފައެވެ.

އެޗްޕީއޭގެ ތަފާސްހިސާބު ދައްކާގޮތުން އިއްޔެގެ ނިޔަލަށް ރާއްޖޭގައި ވަނީ 129424 މީހުންނަށް ކޮވިޝީލްޑް ވެކްސިން ދީފައެވެ.