ވެރިކަންކުރާ އެމްޑީޕީ ކޯލިޝަންގެ އިސްސަފުގައާއި، އިދިކޮޅު ކޯލިޝަންގެ އިސް ސަފުގައިވެސް އެމްއެމްޕީއާރުސީގެ ޚިޔާނާތުގެ ފައިސާގައި ޖެހިފައިވާ މީހުން ގިނަ ޢަދަދަކަށް އެބަތިބި ކަމަށް ކުރީގެ އޮޑިޓަރ ޖެނެރަލް ނިޔާޒް އިބްރާހީމް ވިދާޅުވެއްޖެއެވެ.

އެމްއެމްޕީއާރުސީގެ މައްސަލަ އެންމެ ފުރަތަމަ ޢާއްމުންގެ ސަމާލުކަމަށް ގެންނެވި ނިޔާޒް މި މޭރުމުން ވިދާޅުވެފައި މިވަނީ އެމްއެމްޕީއާރުސީގެ ޚިޔާނާތްތެރިންގެ ލިސްޓްކަމަށް ބުނެ ގިނަ ޢަދަދެއްގެ ބަޔަކު ހިމެނޭ ލިސްޓެއް ސޯޝަލް ޑީއާގައި ޢާއްމުވެފައި ވަނިކޮށެވެ.

ޚިޔާނާތުގެ ލިސްޓާއި ގުޅިގެން ނިޔާޒް ވިދާޅުވީ، އެމްއެމްޕީއާރުސީގެ ޚިޔާނާތުގެ މައްސަލަ ރާއްޖޭގެ ސިޔާސީ ވެށީގައި މިހާރު ތިއްބެވި ބޭފުޅުން ތިއްބަވައިގެން އިންސާފުވެރިކޮށް ބެލޭނެކަމަށް ޤަބޫލު ނުކުރަށްވާ ކަމަށެވެ. ސަބަބަކީ ވެރިކަންކުރާ އެމްޑީޕީ ކޯލިޝަންގެ އިސްސަފުގައާއި، އިދިކޮޅު ކޯލިޝަންގެ އިސް ސަފުގައިވެސް އެމްއެމްޕީއާރުސީގެ ޚިޔާނާތުގެ ފައިސާގައި ޖެހިފައިވާ މީހުން ގިނަ ޢަދަދަކަށް ތިބުން ކަމަށް އޭނާ ވިދާޅުވިއެވެ.

"ޚިޔާނާތުގެ މައްސަލަ އިންސާފުވެރިކަމާއެކު ބަލައި ރައްޔިތުންނަށް އިންސާފު ހޯދައި ދެވިދާނެ ކަމަށް ޤަބޫލެއް ނުކުރަން." ނިޔާޒް އިބްރާހިމް ވިދާޅުވެފައިވެއެވެ.

ޚިޔާނާތުގެ ފައިސާ ލިބުނު މީހުންގެ ލިސްޓް މަޖިލީހުގެ ސަބްކޮމިޓީން ރޭ ފައިނަލް ކޮށްފައިވާއިރު، އެ ރިޕޯޓް ލަސްނުކޮށް ފައިނަލްކޮށް މަޖިލީހުގެ ތަޅުމަށް ފޮނުވަން ޖޮއިންޓް ކޮމިޓީން އެންމެ ފަހުން ބޭއްވި ބައްދަލުވުމުގައި ވަނީ ނިންމާފައެވެ.

އެމްއެމްޕީއާރުސީގެ ހިޔާާނާތުގެ ފައިސާ ލިބުނު ކަމަށް ތުހުމަތުވާ 281 ފަރާތެއްގެ ނަމާއި މައުލޫމާތު އެސެޓް ރިކަރަވީ ކޮމިޝަނުން މަޖިލީހަށް ވަނީ ފޮނުވާފައެވެ. ލީކުވެފައިވަނީ މަޖިލީހަށް ލިބިފައިވާ އަސްލު ލިސްޓު ނޫންކަމަށް މަޖިލީހުގެ ބައެއް މެމްބަރުން ވަނީ ވިދާޅުވެފައެވެ.