އެމްއެމްޕީއާރުސީގެ އަސްލު ލިސްޓުގައި ދައުލަތުގެ މަގާމުތަކުގައި ތިބި 119 މީހެއްގެ ނަން އެބައޮތް ކަމަށް އެ ލިސްޓް ދިރާސާ ކުރަމުންދާ މަޖިލީހުގެ ކޮމިޓީގެ މުޤައްރިރު މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވެއްޖެއެވެ.

އެމްއެމްޕީއާރްސީގެ ހިޔާނާތާ ގުޅޭ މައްސަލަ ބަލަމުން ދަނީ މަޖިލީހުގެ ޖުޑިޝަރީ ކޮމިޓީއާއި ސަލާމަތީ ހިދުމަތްތަކާ ބެހޭ ކޮމިޓީގެ ޖޮއިންޓް ކޮމިޓީ އަކުންނެވެ. ކޮމިޓީގެ މިއަދުގެ ބައްދަލުވުމުގައި ނިންމާފައި ވަނީ ރިޕޯޓާއެކު ކޮމިޝަނުން މަޖިލީހަށް ފޮނުވާފައިވާ އަސްލު ލިސްޓް އާންމުކުރުމަށެވެ. އިންތި ވިދާޅުވީ އެސެޓް ރިކަވަރީ ކޮމިޝަނުން ފޮނުވި ލިސްޓަށް މަޖިލީހުން އެއްވެސް ބަދަލެއް ނުގެންނާނެ ކަމަށެވެ.

އާންމުކުރަން ނިންމި ލިސްޓްގައި ދައުލަތުގެ މަގާމުތަކުގައި ތިބި 119 މީހެއްގެ ނަން ހިމެނޭއިރު އޭގެ ތެރެއިން އައްޔަންކޮށްފައިވާ މަގާމުތަކުގައި ތިބި މީހުން މަގާމުތަކުން ވަކިކުރަން މަސައްކަތް ފެށުމަށް ކޮމިޓީން ވަނީ ނިންމާފަ އެވެ. އާންމުކުރަން ނިންމާފައިވަނީ މުޅި ލިސްޓާއި ދައުލަތުގެ މަގާމުތަކުގައި ތިބި މީހުންގެ ނަންތައް ހިމެނޭ ލިސްޓް ވަކިންނެވެ.

އޭގެ އިތުރުން އިންތިހާބީ މަގާމުތަކުގައި ތިބި މީހުން ވަކި ކުރެވޭނެ ހަމައެކަނި ގޮތަކީ އަމިއްލައަށް އިސްތިއުފާ ދިނުން ކަމަށް ވާތީ އެފަދަ މީހުންގެ މައްސަލަތައް އަވަސް ކުރުމަށް ކަމާބެހޭ އިދާރާތަކަށް ދެންނެވުމަށް ވެސް ކޮމިޓީން ވަނީ ނިންމާފަ އެވެ.

މަޖިލީހުގެ ކޮމިޓީގެ ނިންމުން މިގޮތަށް އައިސްފައި މިވަނީ ޚިޔާނާތުގެ ލިސްޓް ކަމަށް ބުނާ ލިސްޓެއް ސޯޝަލް މީޑިއާގައި ދައުރުވަމުން އަންނަ ވަގުތެއްގައެވެ. ނަމަވެސް މަޖިލީހުގެ ބައެއް މެމްބަރުން ވިދާޅުވެފައި ވަނީ ލީކްވެފައިވާ ލިސްޓާއި، ކޮމިޝަނުން މަޖިލީހަށް ފޮނުވި ލިސްޓުގައި ތަފާތު ތަކެއް ހުރި ކަމަށެވެ.