ކޯވިޑް-19 އާއި ހަނގުރާމަކުރުމަށް އެންޓިބޮޑީސްއާއި ގުޅޭ ދިރާސާތަށް ކުރުމަށް ކެނެޑާގެ އަމިއްލަ ކުންފުންޏެއްކަމަށްވާ އެބްސެލެރާ ބަޔޮލޮޖިކްސް އިންކް އަށް ކެނެޑާގެ ސަރުކާރުން 176 މިލިއަން ކެނެޑާ ޑޮލަރު ދޭން ނިންމާފައިވާކަން ހާމަކޮށްފިއެވެ.

ކެނެޑާގެ ފެޑެރަލް އިނޮވޭޝަން މިނިސްޓަރ ނަވްދީޕް ބެއިންސް އާއި ހަވާލާދީ ރޮއިޓަރސް އިން ބުނީ އެބްސެލެރާއިން މިހާތަަނަށް ކޯވިޑް-19އިން ރަނގަޅުވެފައިވާ މީހެއްގެ ގައިން 500 އަށް ވުރެން ގިނަ އެންޓިބޮޑީސް ނަގައި ދެނެގަނެފައިވާކަމަށާއި، ކެނެޑާ ސަރުކާރުން ދޭ ފަންޑިންގްއަކީ އެބްސެލެރާގެ ގާބިލުކަން އިތުރުކޮށް ކޯވިޑް-19 އާއި ހަނގުރާމަކުރުމަށް ވަސީލަތެއް ހޯދައިދިނުމަށް ވެދޭ ބޮޑު އެހީއެއް ކަމަށެވެ. އަދި އެބްސެލެރާއިން މިއަހަރުގެ ޖުލައި މަހުގެ ތެރޭގައި ކްލިނިކަލް ޓްރަޔަލްތަށް ބޭއްވުމަށް ތައްޔާރުވަމުން އަންނަ ކަމަށް ބެއިންސް ވިދާޅުވިއެވެ.

އެބްސެލެރާއިން ބުނެފައިވާ ގޮތުގައި މާރޗްމަހުގައި އެކުންފުނިން އެންޓިބޮޑީ އުފައްދަމުން އައީ އީލައި ލިލީ އެންޑް ކޯ އާއި ގުޅިގެންނެވެ. އެކުންފުނިން މިހާރުވަނީ މިފައިސާ ބޭނުންކޮށްގެން އެކަމަށް ޚާއްޞަ ފެސިލިޓީއެއް ވެސް ގާއިމު ކުރަން ނިންމާފައެވެ.

ދުނިޔޭގައި 3.5 މިލިއަނަށް ވުރެ ގިނަ މީހުން މިހާތަނަށް ކޯވިޑް-19 އަށް ޕޮޒިޓިވްވެފައިވާއިރު، ކެނެޑާއިން ޕޮޒިޓިވްވެފައިވާ މީހުންގެ އަދަދު އުޅެނީ 59،474ގައެވެ. އަދި އެގައުމުން މަރުވި މީހުންގެ އަދަދު ވަނީ 3،682 އަށް އަރާފައެވެ.