ޗެލެންޖު ކޮށްގެން ސިޔާސީ ކަންތައްތައް ކުރުމުގެ ހިތްވަރު ދަނގެތީ ދާއިރާގެ މެންބަރު މުޙައްމަދު ނާޒިމާއި، ތިމަރަފުށީ ދާއިރާގެ މެންބަރު ޢަބްދުﷲ ރިޔާޒްގެ ނެތްކަމަށް ޖުމްހޫރީ ޕާޓީގެ ލީޑަރ ޤާސިމް އިބްރާހިމް މިއަދު ވިދާޅުވެއްޖެއެވެ.

މިއަދު ނޫސްވެރިންނާ ބައްދަލު ކުރައްވާ ވާހަކަފުޅު ދައްކަވަމުން ޤާސިމް ވިދާޅުވީ، ނާޒިމާއި ރިޔާޒް މަޖިލީހަށް ހޮވަން މީސްމީހުންގެ އަތުން ދަރަންޏަށް ނެންގެވި ފައިސާވެސް އަދި ޚަލާސް ނުކުރެވޭ ކަމަށާއި، އެބޭފުޅުން މަޖިލީހަށް އިންތިޚާބު ކުރެއްވުމަށް މިލިއަނުން ޚަރަދު ކުރަށްވާފައިވާނެ ކަމަށެވެ. އަދި ޗެލެންޖު ކޮށްގެން ސިޔާސީ މަސައްކަތް ކުރުމުގެ ހިތްވަރު ރިޔާޒާއި ނާޒިމްގެ ނުހުންނާނެ ކަމަށް ޤާސިމް ވިދާޅުވިއެވެ.

އޭގެ އިތުރުން މިއަދު ޖުމްހޫރީ ޕާޓީ ނިދާފައިއޮތް ވާހަކަ ދައްކަވާއިރު، ނާޒިމާއި ރިޔާޒަކީ ޖުމްހޫރީ ޕާޓީއަށް އެއްވެސް ކަމެއް ކޮށްދެއްވި ބައެއް ނޫންކަމަށާއި، ނަމަވެސް ޤާސިމް އެބޭފުޅުންނަށް ކޮށްދެއްވި ކަންތައްތަކަށް އެބޭފުޅުންނަށް ދެކޮޅު ނުހެއްދެވޭނެ ކަމަށް ޤާސިމް ވަނީ ވިދާޅުވެފައެވެ.

މިއަދުގެ ނޫސްވެރިންގެ ބައްދަލުވުމުގައި ޤާސިމް ވިދާޅުވީ، ޖުމްހޫރީ ޕާޓީއަށް ވުރެ ޑިމޮކްރަޓިކް ޕާޓީއެއް ނޯންނާނެ ކަމަށެވެ. އަދި ޖުމްހޫރީ ޕާޓީއާއި ގުޅޭގޮތުން ޕާޓީން ވަކިވި ބޭފުޅުންނާއި އެހެން ބޭފުޅުން ދައްކަވާ ވާހަތަކަކީ، އެއްވެސް ސަމާލުކަމެއް ދޭ ކަމެއް ނޫންކަމަށާއި، އެ ޕާޓީ ނިކަމެތިކޮށް ނުލެވޭނެ ކަމަށް ޤާސިމް ވިދާޅުވިއެވެ.