ރާއްޖެއިން ބަންގްލަދޭޝަށް ކޮވިޑް ވެކްސިން ހަދިޔާކޮށްފިއެވެ.

ރާއްޖޭގައި ހުންނަ ބަންގްލަދޭޝްގެ ހައިކޮމިޝަނާ ޙަވާލާދީ, ބަންގްލަދޭޝްގެ މީޑިއާއިން ރިޕޯޓް ކޮށްފައިވާ ގޮތުގައި ދިވެހި ސަރުކާރުގެ ފަރާތުން 201,600 އެސްޓްރަޒެނެކާ ވެކްސިން އެޤައުމަށް ވަނީ ހަދިޔާ ކޮށްފައެވެ. އެކަމާ ގުޅޭ އެއްބަސްވުމެއްގައި ދެޤައުމުން އިއްޔެ ސޮއިކޮށްފައިވާ ކަމަށްވެސް މީޑިއާ ރިޕޯޓްތަކުގައި ވެއެވެ.

އެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ހެލްތު މިނިސްޓަރު އަހުމަދު ނަސީމު ކަމަށާއި ބަންގްލަދޭޝްގެ ފަރާތުން ސޮއިކުރެއްވީ އެގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ރިއާ އެޑްމިރަލް މުހައްމަދު ނަޒްމުލް ހަސަން ކަމަށް ނޫސްތަކުން ބުނެފައި ވެއެވެ.

ރާއްޖެއިން ހަދިޔާކުރި ވެކްސިން މާދަމާގެ ވަގުތެއްގައި ދަކާސްތާ ޝާހްޖަލާލް އިންޓަނޭޝަނަލް އެއާޕޯޓަށް ފޯރާނެ ކަމަށްވެސް މީޑިއާތަކުން ރިޕޯޓް ކުރެއެވެ.

ރާއްޖޭގައި މިހާތަނަށް 392,773 މީހަކު ވަނީ ވެކްސިންގެ ފުރަތަމަ ޑޯޒް ޖަހައިފަ އެވެ. އަދި 343,149 މީހަކު ވަނީ ދެ ވަނަ ޑޯޒް ފުރިހަމަކޮށްފަ އެވެ. މީގެއިތުރުން ހައި ރިސްކް މީހުންނަށް މިހާރު އަންނަނީ ބޫސްޓާ ޑޯޒް ވެސް ޖަހައިދެމުންނެވެ.