ކޯވިޑް-19 އާ ގުޅިގެން މިވަގުތު މޮނިޓަރިންގައި އޮތީ ރާއްޖޭގެ 16 ރަށެއް ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭ އިން ޢާއްމުކޮށްފައިވާ ތަފާސްހިސާބުތައް ދައްކާގޮތުން މިވަގުތު ރާއްޖޭގައި މޮނިޓަރިންގެ ޙާލަތުގައި އޮތީ ޖުމްލަ 16 ރަށެކެވެ. އެއީ އައްޑޫ ސިޓީގެ 5 ރަށަކާއި، ގއ. ގެމަނަފުށި، ގއ. މާމެންދޫ، ތ. ދިޔަމިގިލި، ށ. މާއުނގޫދޫ، ފ. ނިލަންދޫ، ނ. ވެލިދޫ، އދ. އޮމަދޫ، ލ. ފޮނަދޫ، ދ. މާއެނބޫދޫ، މ. ވޭވަށް އަދި ލ. ގަމެވެ.

މީގެ ތެރެއިން އެންމެ ގިނަދުވަހު މޮނިޓަރިންގައި އޮތީ އައްޑޫސިޓީގެ 4 ރަށެކެވެ. އެއީ ސ. ހިތަދޫ، މަރަދޫ، މަރަދޫފޭދޫ އަދި ފޭދޫއެވެ. މި ރަށްތައް މޮނީޓަރިންގަށް ލާފައިވަނީ މިދިޔަ އޮގަސްޓު މަހުގެ 28 ވަނަ ދުވަހުގައެވެ.

އެޗްޕީއޭގެ ތަފާސް ހިސާބުތައް ދައްކާގޮތުން ރާއްޖެއިން ބަލިޖެހުނު މީހުންގެ ޖުމްލަ އަދަދު މިހާރު ވަނީ 85،394 އަށް އަރާފައެވެ. އަދި އިއްޔެ އިރުއޮއްސި 6:00 އަށް އެކްޓިވް ކޭސްތައް ނުވަތަ ބަލިޖެހިފައި ތިބި މީހުންގެ އަދަދު އުޅެނީ 1،339 ގައެވެ.

މިހާތަނަށް ރާއްޖެއިން ބަލިޖެހުނު މީހުންގެ ތެރެއިން 83،809 މީހުންވަނީ ބަލިން ރަނގަޅުވެފައެވެ. ކޮވިޑް ޖެހިގެން މިހާތަނަށް ރާއްޖޭގައި ނިޔާވި މީހުންގެ އަދަދު ވަނީ 233 އަށް އަރާފައެވެ.