ރާއްޖޭގެ ރަށްރަށުގައި ކޯވޑް-19ގެ ޙާލަތު އަނެއްކާވެސް ގޯސްވެ 31 ރަށެއް މޮނިޓަރިން އަށް ލައިފިއެވެ.

ކޯވިޑް-19ގެ ޙާލަތު މާލޭގައި އާއްމު ޙާލަތަކަށް ގެނެވިފައިވީ ނަމަވެސް ރަށްރަށުގައި ބަލި ފެތުރޭ ނިސްބަތް މިހާރުވަނީ ބޮޑުތަނުން އިތުރުވެފައެވެ. އެކަމާ ގުޅިގެން ރަށްރަށުގައި އަޅާފައިވާ ފިޔަވަޅުތައް ހަރުކަށި ކުރުމަށް ހެލްތް ޕްރޮޓެކްޝަން އެޖެންސީން މަޝްވަރާ ކުރަމުންދާކަމަށް މަޢުލޫމާތު ލިބެއެވެ. ނަމަވެސް ގެންނަވާ ބަދަލުތަކުގެ ތަފްސީލެއް އަދި ނޭނގެއެވެ.

އެޗްޕީއޭއިން ޢާއްމު ކޮށްފައިވާ މަޢުލޫމާތުތައް ދައްކާގޮތުން އިއްޔެ އެކަނިވެސް ރާއްޖޭގެ ހަތް ރަށެއް ވަނީ މޮނިޓަރިން އަށް ލާފަ އެވެ. މިއާއެކު މިހާރު މޮނިޓަރިންގައި 31 ރަށެއް އެބައޮތެވެ.

މިވަގުތު މޮނިޓަރިންގައި އޮތް ރަށްތަކަކީ ށ. އަތޮޅުން ފުނަދޫ އާއި ގޮއިދޫ، ނ. އަތޮޅުން ކުޑަފަރި، ވެލިދޫ، ހޮޅުދޫ، ކެނދިކުޅުދޫ، މިލަދޫ، ރ. އަތޮޅުން އަލިފުށި، މަޑުއްވަރީ، މީދޫ، އިންނަމާދޫ، ބ އަތޮޅުން ގޮއިދޫ އަދި ހިތާދޫ، ކ. އަތޮޅުން ގުރައިދޫ އާއި ހުރާ، މ. އަތޮޅުން މުލައް، ދިއްގަރު، މުލި، ފ. އަތޮޅުން ބިލެއްދޫ އަދި ނިލަންދޫ، ދ. އަތޮޅުން މާއެނބޫދޫ، ތ. އަތޮޅުން ތިމަރަފުށި، ލ. އަތޮޅުން ގަން، ގއ. އަތޮޅުން މާމެންދޫ، ގދ. އަތޮޅުން ފަރެސްމާތޮޑާ އާއި ކަނޑުހުޅުދޫ، އައްޑު އަތޮޅުން ހިތަދޫ، މަރަދޫ، މަރަދޫފޭދޫ، ފޭދޫ އަދި ހުޅުމީދޫ އެވެ.



ރާއްޖެއިން ބަލިޖެހުނު މީހުންގެ ޖުމްލަ އަދަދު މިހާރު 89،999 އަށް އަރާފައިވާއިރު އިއްޔެ އިރުއޮއްސި 6:00 އަށް ބަލިޖެހިފައި ތިބި މީހުންގެ އަދަދު އުޅެނީ 2،201 ގައެވެ. އިއްޔެ ގްރޭޓަރ މާލެ ސަރަހައްދުން 19 މީހަކު ބައްޔަށް ޕޮޒިޓިވްވެފައި ވާއިރު އެހެނިހެން ސަރަހައްދު ތަކުން ޕޮޒިޓިވްވީ 140 މީހުންނެވެ. މީގެ ތެރޭގައި އަތޮޅުތެރޭގެ ރަށްތަކުން ޕޮޒިޓިވްވި 124 މީހަކު ހިމެނެއެވެ.

އެޗްޕީއޭ ގެ ތަފާސްހިސާބުން ދައްކާގޮތުން މިވަގުތު ހޮސްޕިޓަލްގައި އެޑްމިޓްކޮށްގެން ފަރުވާދެމުން ގެންދަނީ 09 މީހުންނަށެވެ. ކޮވިޑް ޖެހިގެން މިހާތަނަށް ރާއްޖޭގައި ނިޔާވި މީހުންގެ އަދަދު ވަނީ 247 އަށް އަރާފައެވެ.