ބޭންކް އޮފް މޯލްޑިވްސްގެ ހިދުމަތަށް ބުރޫއެރީ ބޮޑު އަޕްގްރޭޑަކަށްފަހު ކަމަށާއި މައްސަލަ ޙައްލު ކުރުމަށް މަސައްކަތް ކުރަމުންދާ ކަމަށް ބޭންކުން ހާމަކޮށްފިއެވެ.

ބޭންކުން މިއަދު ބުނީ ބޭންކުގެ އޮޕަރޭޝަން ރަނގަޅު ކުރުމަށާއި ސިސްޓަމް ތަކުގެ ސެކިއުރިޓީ އާއި ޓެކްނޮލޮޖީ ސްޓޭންޑަޑް ދެމެހެއްޓުމަށްޓަކައި، ބޭންކް އޮފް މޯލްޑިވްސް އިން ސިސްޓަމް އަޕްގްރޭޑް ކުރުމުގެ މަސައްކަތްތައް އަބަދުވެސް ކުރާކަމަށެވެ.

"މިގޮތުން، 21 ނޮވެމްބަރު 2021 ގައި ބޭންކުގެ ކޯ ބޭންކިންގ ސިސްޓަމްގެ އަޕްގްރޭޑްގެ ބޮޑު މަސައްކަތެއް ވަނީ ނިންމާލާފައެވެ. ކޯ ބޭންކިންގ ސިސްޓަމްގެ އަޕްގްރޭޑް މަސައްކަތަކީ އުނދަގޫ އަދި އެހާމެ ބޮޑު މަސައްކަތަކަށް ވުމާއެކު މިކަމުގެ ސަބަބުން ހިދުމަތްތައް މެދުކެނޑިގެން ދިޔުމަކީ ދުނިޔޭގެ ކޮންމެ ބޭންކަކަށްވެސް ކުރިމަތިވެދާނެކަމެވެ." ބޭންކުން މިއަދު ހާމަ ކޮށްފައިވެއެވެ.

ބޭންކުން ބުނީ ކުރިން އަންދާސާކުރެވުނީ މި އަޕްގްރޭޑްގެ ސަބަބުން ސިސްޓަމްތައް މެދުކެނޑިގެންދާނީ ކުޑަ މިންވަރަކަށް ކަމަށް ކަމުގައިވީ ނަމަވެސް ސިސްޓަމަށް ދިމާވެދާނެ ކަމަކަށް ތައްޔާރުވެ ބޭންކުންވަނީ ކުރިޔާލާ ކަސްޓަމަރުންނަށް އަންގާފައި ކަމަށެވެ. ނަމަވެސް އަޕްގްރޭޑްގެ މަސައްކަތަށްފަހު ދޭތެރެދޭތެރެއިން ސިސްޓަމްތައް މެދުކެނޑުމުގެ މައްސަލަ ދިމާވަމުންދާ ކަމަށާއި ބޭންކުން ދަނީ މި މައްސަލަ ހައްލުކުރުމަށް ކެނޑިނޭޅި މަސައްކަތް ކުރަމުން ކަމަށެވެ.

ބީއެމްއެލުން ވަނީ ހިދުމަތަށް ބުރޫއަރައި ކަސްޓަމަރުންނަށް ދިމާވަމުންދާ ދަތިތަކަށްޓަަކައި ނިހާޔަތަށް މަޢާފަށް އެދިފައެވެ. އަދި މި ދަނޑިވަޅުގައި ކަސްޓަމަރުން ދެއްވާ އެއްބާރުލުމަށް ބޭންކުން ވަނީ ޝުކުރު ދަންނަވާފައެވެ.