އަހަރީފީ ނުދައްކާތީ އުވާލާ ކުންފުނި ތަކުގެ ލިސްޓުގައި ހިމަނާ އިއްޔެ އުވާލަން ގެޒެޓް ކޮށްފައިވާ ގައުމީ އެއާލައިން، މޯލްޑިވިއަންގެ ނަން އޮތް ނަމަވެސް ބަރާބަރަށް އަހަރީ ފީ ދައްކަމުން ދާކަމަށް އެކުންފުނިން މިއަދު ބުނެފިއެވެ.

ހިންގުން ދޯދިޔާވެ ވަރަށް ބޮޑަށް ގެއްލުންވާތީ ބަނގުރޫޓު ވުމުގެ ބުރާއި ކުރިމަތިލާން ޖެހިފައިވާ މޯލްޑިވިއަނުން މިހެން ބުނެފައިމިވަނީ އިކޮނޮމިކް މިނިސްޓްރީން އަހަރީފީ ނުދައްކައިގެން އުވާލާ 3،967 ކުންފުނީގެ ލިސްޓުގައި އައިލެންޑް އޭވިއޭޝަންގެ ނަން އޮތްކަން ފާހަގަވުމާ ގުޅިގެންނެވެ. އިކޮނޮމިކް މިނިސްޓްރީން ޢާއްމުކުރި ލިސްޓް މިހާރުވަނީ ގެޒެޓުން ނަގާފައެވެ.

އެކަމާއި ގުޅިގެން މޯލްޑިވިއަނުން ކުރި ޓްވީޓެއްގައި ބުނެފައިވަނީ އަހަރީ ފީގެ ގޮތުގައި ދައްކަން ކަނޑައަޅާފައި އޮންނަ ފައިސާ ދައްކަން އޮންނަ މުއްދަތުގައި އެ ކުންފުނިން ދެއްކި ކަމަށެވެ. އެހެން ކަމުން އެންމެހާ ކަސްޓަމަރުންނާއި ޕާޓްނަރުންނަށް އެކަން ސާފުކޮށްދެން ބޭނުންވާ ކަމަށް މޯލްޑިވިއަންގެ ޓްވީޓުގައި ބުނެފައިވެއެވެ.

ކުންފުނިތަކުގެ އަހަރީ ފީގެ ގޮތުގައި ދައްކަން ކަނޑައަޅާފައި އޮންނަ ފައިސާ ދައްކަން އޮންނަ މުއްދަތުގައި މިކުންފުނިން ވާނީ ދައްކާފައެވެ. މިކަން އެންމެހާ ކަސްޓަމަރުންނާއި ޕާޓްނަރުންގެ ސަމާލުކަމަށްޓަކައި ދަންނަވާލީމެވެ.

— Maldivian (@MaldivianAero) December 2, 2021

ކުރީގެ ޕްރޮސެކިއުޓަރ ޖެނެރަލް އަލްއުސްތާޛު އަޙްމަދު މުއިއްޒު މިއަދު ކުރަށްވާފައިވާ ޓްވީޓެއްގައި ވިދާޅުވެފައިވަނީ އަހަރީފީ ނުދައްކައިގެން އުވާލާ ކުންފުނިތަކުގެ ލިސްޓު އިއްޔެ ގެޒެޓް ކުރިއިރު އޭގެ ތެރޭގައި ސަރުކާރުގެ މައިއެއާލައިން، އައިލެންޑް އޭވިއޭޝަން ސަރވިސަސްގެ ނަން އެބަ އޮތް ކަމަށެވެ.

މުޢިއްޒުވަނީ އެއީ އޮޅުމެއްތޯ ސުވާލު ކުރަށްވާފައެވެ. އަދި މުއިއްޒުގެ ޓްވީޓްގައި ވަނީ އެ ލިސްޓްގައި އައިލެންޑް އޭވިއޭޝަންގެ ނަން ހައިލައިޓް ކުރަށްވާ ފާހަގަ ކުރަށްވާފައެވެ.