ދެކުނު އޭޝިއާގެ ގައުމުތަކުން ރާއްޖެއަށް ދަތުރުކުރާ ވާކް ޕާމިޓް ހޯލްޑަރުން ރާއްޖެ އެތެރެވުމަށްފަހު އެޗްޕީއޭއިން ކަނޑައަޅާ ފެސިލިޓީއެއްގައި ކަރަންޓީނުވުމަށް ކަނޑައަޅާފައިވާ އުސޫލަށް ބަދަލުގެންސްފިއެވެ.

މިކަން ހާމަކޮށް އެޗްޕީއޭއިން ނެރުނު އިއުލާނެއްގައި ބުނެފައިވަނީ މި ބަދަލާއެކު، ކަނޑައެޅިފައިވާ ގޮތުގެ މަތިން ކޮވިޑް-19 ވެކްސިން ފުރިހަމަނުވާ، ރާއްޖެއަށް އެތެރެވާ ވޯރކް ޕަރމިޓް ހޯލްޑަރުން ކަރަންޓީނުވުމުގައި އަމަލުކުރަންޖެހޭ ދެ ގޮތެއް މިހާރު ވަނީ ކަނޑައަޅާފައެވެ.



ކޮވިޑް-19ގެ ވެކްސިން ފުރިހަމަވެފައިނުވާ ވޯރކް ޕަރމިޓް ހޯލްޑަރުން ރާއްޖެ އެތެރެވުމަށްފަހު، އެމީހަކު ރާއްޖެއަށް ގެންނަ ފަރާތުން ކަނޑައަޅާ ތަނެއްގައި ކަރަންޓީނުވާން ޖެހޭނެއެވެ. އަދި އެފަދަ މީހުން ކަރަންޓީނުން ދޫކޮށްލެވޭނީ، 14 ދުވަސް ހަމަކޮށް ކޮވިޑް ޓެސްޓް ހަދާ ނަތީޖާ ނެގެޓިވް ވުމުންނެވެ.

ދެކުނު އޭޝިޔާގެ ގައުމުތަކުން އަންނަ ވޯކް ޕާރމިޓް ހޯލްޑަރުން އަމަލު ކުރުމަށް ކަނޑައަޅާފައިވާ އަނެއް ގޮތަކީ އެފަދަ މީހުން ރާއްޖެއަށް އައުމުގެ މަދުވެގެން 1 ދުވަސް ކުރިން ކަރަންޓީނުވާ ތަނުގެ މައުލޫމާތު އެޗްޕީއޭއަށް އެންގުމެވެ.

މިއަހަރުގެ ޖޫން މަހުގެ 29 ވަނަ ދުވަހު އެޗްޕީއޭއިން ވަނީ އެ އެޖެންސީއިން ކަނޑައަޅާ ފެސިލިޓީއެއްގައި ވާކް ޕާމިޓް ހޯލްޑަރުން ރާއްޖެ އެތެރެވުމަށްފަހު ކަރަންޓީނުވާ ގޮތަށް ހަމަޖައްސާފައެވެ. އެދުވަސްވަރަކީ އެންމެ ހަލުވިކަމާއެކު ރާއްޖޭގައި ކޮވިޑް ފެތުރެމުންދިޔަ ދުވަސްވަރެވެ. ނަމަވެސް، އެޗްޕީއޭއިން ވަނީ މިއަދު މި އުސޫލަށް ބަދަލު ގެނަސް އެކަން އިއުލާންކޮށްފައެވެ.