ކޯވިޑްގެ އޮމިކްރޯން ވޭރިއަންޓް، ކުޑަކުދިންނަށް ޖެހޭ މިންވަރު އިތުރު ކަމަށާއި އެއީ ސަމާލުކަން ދޭންޖެހޭ ކަމެއްކަމަށް ކުޑަކުދިންގެ ޚާއްސަ ޑޮކްޓަރ ޑރ އަޙްމަދު ފައިސަލް ވިދާޅުވެއްޖެއެވެ.

ރާއްޖެއިން ކޯވިޑް އޮމިކްރޯނަށް ޕޮޒިޓިވް ކޭސްތަކުގެ ޢަދަދު މިހާރު ވަނީ ފަހަކަށް އަރާފައެވެ. އެންމެ ފުރަތަމަ ރާއްޖޭން އޮމިކްރޯން ފެނިފައިވަނީ މި މަހުގެ ފަސްވަނަ ދުވަހުގައެވެ. އެއީ މިދިޔަ މަހުގެ 27 ގައި ރާއްޖެއައި ފަތުރުވެރިއެއްގެ ގައިން ނެގި ސާމްޕަލަކުންނެވެ.

ހަލުވި ދުވެލީގައި ފެތުރޭ އޮމިކްރޯން ވޭރިއަންޓްގެ ސަބަބުން ކުޑަކުދިންނަށް ހުރި ނުރައްކަލާ ގުޅޭގޮތުން ޑރ. ފައިސަލް ވިދާޅުވީ ކުޑަކުދިން ބަލިވުމުން ކާންދިނުން ދަތިވާނެ ކަމަށެވެ. އެހެންކަމުން ހޮސްޕިޓަލްގައި ބާއްވަންޖެހޭ ކުދިން އިތުރުވެ އެނދުތައް ފުރޭނެ ކަމަށް ޑރ. ފައިސަލް ވިދާޅުވިއެވެ.

"އޮމިކުރޯނުން ބަލި ބޮޑު ނުވިޔަސް ކުޑަކުދިންނަށް ޖެހޭލެއް ގިނަ.. އޮމިކުރޯން ފެތުރުނަނުދިނުމަށް ސަމާލުވާންވާނެ." ޑރ. ފައިސަލް ވިދާޅުވެފައިވެއެވެ.

އޮމިކުރޯނުން ބަލި ބޮޑު ނުވިޔަސް ކުޑަކުދިންނަށް ޖެހޭލެއް ގިނަ
އެ👶 ހުންއައިމަ އެއްޗެއް ނުކައި ނުބޮއި ހެދީމާ، 🏥ގައި ބާއްވަންޖެހޭލެއް ގިނަވާނެ، އެނދުތައް ފުރޭނެ
އޮމިކުރޯން ފެތުރުނަނުދިނުމަށް ސަމާލުވާންވާނެ https://t.co/1OqIv1ocZU

— Ahmed Faisal (@Faisalnaifaru) December 16, 2021

އިނގިރޭސިވިލާތުގެ ތަފާސް ހިސާބުތައް ދައްކާގޮތުން އެޤައުމުގައި ޢުމުރުން 5 އަހަރާއި 9 އަހަރާއި ދެމެދުގެ ކުދިންނަށް ކޯވިޑް އޮމްރިކޯން ޖެހޭ ނިސްބަތް ވަނީ އިތުރުވެފައެވެ.

ދުނިޔޭގެ ސިއްހަތު ޖަމްއިއްޔާއިން ނެރުނު ބަޔާނެއްގައި މީގެ ކުރިން ބުނީ "އޮމިކްރޯން" ވޭރިއަންޓަކީ ވަރަށް އަވަހަށް ފެތުރޭ އަދި ވަރަށް ބޮޑަށް ކަންބޮޑުވުން އޮތް ވޭރިއަންޓެއް ކަމަށެވެ.