ރާއްޖޭގައި ކޯވިޑް-19 ބޫސްޓަރ ޑޯޒް ޖެހި މީހުންގެ ޢަދަދު 23 ހާހަށް އަރައިފިއެވެ.

އެޗްޕީއޭ އިން އެންމެ ފަހުން ޢާއްމުކުރި ތަފާސް ހިސާބުން ދައްކާގޮތުން މިހާތަނަށް 23،728 މީހުން ވަނީ ކޯވިޑް ބޫސްޓަރ ޑޯޒް ޖަހާފައެވެ. ތިންވަނަ ޑޯޒެއްގެ ގޮތުގައި ރާއްޖޭގައި ދެނީ ފައިޒާ ވެކްސިނެވެ. ދިވެހިރާއްޖޭގައި މީހުން ދިރިއުޅޭ 189 ރަށުގެ ތެރެއިން 9 ރަށެއް ފިޔަވައި އެހެން ހުރިހާ ރަށެއްގައި 90 އިންސައްތަ މީހުން މިހާރު ވަނީ ކޯވިޑް ވެކްސިން ފުރިހަމަކޮށްފައިި ކަމަށް އެޗްޕީއޭ އިން ވަނީ ބުނެފައެވެ.

އެންމެފަހުގެ ތަފާސްހިސާބުތައް ދައްކާގޮތުން ރާއްޖޭގައި ކުރިއަށްގެންދާ ވެކްސިން ދިނުމުގެ ކެމްޕޭނުގެ ދަށުން މިހާތަނަށް 396511 މީހުން ވަނީ ވެކްސިންގެ ފުރަތަމަ ޑޯޒް ޖަހާފައެވެ. އަދި ދެވަނަ ޑޯޒް ޖެހިމީހުންގެ ޢަދަދު އުޅެނީ 366748 ގައެވެ.

ކޯވިޑް ބޫސްޓާ ޑޯޒް ޖެހުމަށްޓަކައި ފައިޒާ ވެކްސިންގެ 100،620 ޑޯޒް މިމަހު ވަނީ ރާއްޖެ ގެެނެސްފައެވެ. ޔުނިސެފުން ބުނީ މިއީ ދުނިޔޭގެ ގައުމުތަކަށް ހަމަހަމަ ކަމާއެކު ވެކްސިން ފޯރުކޮށްދިނުމަށް ޑަބްލިޔުއެޗްއޯ އިސްވެ އުފައްދާފައިވާ ކޮވެކްސް ފެސިލިޓީ މެދުވެރިކޮށް އެމެރިކާގެ ސްޓޭޓް ޑިޕާޓްމަންޓުން ހަދިޔާ ކުރި ވެކްސިން ކަމަށެވެ.

ކޮވިޑް ވެކްސިންގެ ތިންވަނަ ޑޯޒް، ނުވަތަ ބޫސްޓާ ޑޯޒް، އެޗްޕީއޭއިން ޖަހަން ފަށާފައިވަނީ މިދިޔަ މަހުއެެވެ. އެގޮތުން 60 އަހަރުން މަތީގެ މީހުންނާއި ދިފާއީ ނިޒާމު ބަލިކަށި މީހުންނާއި ފްރޮންޓް ލައިންގައި މަސައްކަތް ކުރާ ސިއްހީ މުވައްޒަފުނަށް މިހާރު ވަނީ ވެކްސިންގެ ބޫސްޓާރ ޑޯޒް ޖަހަން ފަށާފައެވެ. މިހާރު 50 އަހަރުން މަތީގެ މީހުނަށް ވެސް ބޫސްޓާ ޑޯޒް ޖަހަން ވަނީ ފުރުސަތު ހުޅުވާލާފައެވެ.

ކޮވިޑް-19 ގެ ތަފާތު ވޭރިއަންޓުތައް މުޅި ދުނިޔޭގައި މިހާރު ފެތުރިފައިވާއިރު، ހުރިހާ މީހުންވެސް ވެކްސިންގެ ދެ ޑޯޒް ފުރިހަމަކޮށްގެން ތިބުމަކީ މުހިންމު ކަމެއްކަމަށާއި، މިކަމުން ބައްޔަށް ހުށަހެޅުމުގެ ހިރާސް ކުޑަކޮށްދޭކަމަށްވެސް އީޔޫގެ ޑްރަގްސް ރެގިއުލޭޓަރ ބުނެފައިވެއެވެ.