އދ. ދަނގެތީ މެޖިސްޓްރޭޓް ކޯޓުގެ އިސް މެޖިސްޓްރޭޓް މުޙައްމަދު އާމިރު ތަމްރީނެއް ފުރިހަމަ ކުރުމަށް ޖުޑީޝަލް ސަރވިސް ކޮމިޝަން ޖޭއެސްސީން އަންގައިފިއެވެ.

ޖޭއެސްސީން ބުނީ އދ. މަހިބަދޫ މެޖިސްޓްރޭޓް ކޯޓަށް ހުށަހެޅުނު މައްސަލައެއްގެ ޝަރީއަތް ކުރިއަށް ގެންދިޔުމުގައި، ޖިނާއީ އިޖުރާއަތުގެ ޤާނޫނުގައި ކަނޑައަޅާފައިވާ އިޖުރާއަތްތަކާ އެއްގޮތަށް އެ ޤަޟިއްޔާގެ ޝަރީޢަތް ހިންގުމަށް އެއްވެސް މަސައްކަތެއް މެޖިސްޓްރޭޓް އާމިރު ކުރަށްވާފައި ނުވާކަމަށެވެ.

އަދި އެމައްސަލާގައި އދ. ދަނގެތި މެޖިސްޓްރޭޓް ކޯޓުގެ އިސްމެޖިސްޓްރޭޓް މުޙައްމަދު އާމިރު ޙުކުމް ކުރަށްވާފައިވަނީ ކުރިން ކުރެވިފައިވާ ތަޖުރިބާތަކެއްގެ ސަބަބުން ވަކި ޙާލަތެއް މެދުވެރި ވެދާނެކަމަށް ކުރެވުނު ލަފައެއްގެ މައްޗަށް ބުރަވެ، ޝަރީޢަތަށް ހުށަހެޅިފައި ނުވާ ކަންތައްތަކެއްގެ މައްޗަށް ބިނާކޮށްކަން ޖޭއެސްސީގެ ތަޙުޤީޤަށް ސާބިތުވެފައިވާކަމަށް އެ ބަޔާނުގައިވެއެވެ.

އެހެންކަމުން އިސްމެޖިސްޓްރޭޓް މުޙައްމަދު އާމިރުގެ މި ޢަމަލަކީ، ދިވެހިރާއްޖޭގެ ފަނޑިޔާރުންގެ ޤާނޫނުގެ 33 ވަނަ މާއްދާގެ (ށ) އާއި އަދި ފަނޑިޔާރުންގެ ސުލޫކީ މިންގަނޑާއި ޚިލާފަށް ކޮށްފައިވާ ޢަމަލަކަށްވާތީ، ޖުޑީޝަލް ސަރވިސް ކޮމިޝަންގެ ޤާނޫނުގެ ދަށުން، ނަޞޭޙަތް ދިނުމާއެކު ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަ ކުރުމަށް އިސްމެޖިސްޓްރޭޓް މުޙައްމަދު އާމިރު އަށް އެންގުމަށް އެ ކޮމިޝަނުން ވަނީ ނިންމާފައެވެ.

ކޮމިޝަނުން އެގޮތަށް ނިންމާފައިވަނީ 2021 ޑިސެމްބަރ 19 ވަނަ ދުވަހު ބޭއްވި މިއަހަރުގެ 100 ވަނަ ބައްދަލުވުމުގައެވެ.