ބޮޑު އަގުގައި ޕީސީއާރު ހެދުން ނިމުމަކަށް ގެންނަން ޖެހޭ ކަމަށް ރައްޔިތުންގެ މަޖިލީހުގެ މަޑަވެލި ދާއިރާގެ އެމްޑީޕީ މެމްބަރު ހުސެއިން ފިރުޝާން ވިދާޅުވެއްޖެއެވެ.

މާލޭ ސަރަޙައްދުގައި ކޮވިޑް ފެތުރޭ ނިސްބަތް އިތުރުވުމާ ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިއްޔެ ނިންމާފައިވަނީ މިއަދުން ފެށިގެން މާލެ ސަރަހައްދުން އެހެން ރަށްރަށަށް ދަތުރު ކުރެވޭނީ ޕީސީއާރު ނެގެޓިވް ނަތީޖާއާއެކު ކަމަށެވެ.

އެކަމާ ގުޅިގެން އަތޮޅުތެރެއަށް ދަތުރުކުރުމަށް ބޭނުންވާ ގިނަ ފަރާތްތަކަކުން ވަނީ ޕީސީއާރު ޓެސްޓް ހެދުމަށް ސޯޝަލް ސެންޓަރާއި ސެނެހިޔާ ހޮސްޕިޓަލް ކައިރީގައި ކިއޫ ހަދާފައެވެ. އޭގެ އިތުރުން ބޮޑުއަގުގައި އަވަހަށް ޕީސީއާރު ޓެސްޓް ހެދުމަށް ގިނަ ބަޔަކު ވަނީ ކްލިނިކްތައްވެސް ފުރާލާފައެވެ.

އެޗްޕީއޭގެ އިސްބޭފުޅުންގެ މަސްލަޙަތު އޮންނަ ކްލިނިކްތަކުން ބޮޑުއަގުގައި ޕީސީއާރު ޓެސްޓް ހަދާ މައްސަލާގައި ކަންބޮޑުވުން ފާޅުކޮށް މެންބަރު ފިރުޝާން ވިދާޅުވީ ބޮޑު އަގުގައި ޕީސީއާރު ޓެސްޓު ހެދުން ނިމުމަކަށް ގެންނަންޖެހޭ ކަމަށެވެ. އަދި އެޗްޕީއޭއިން މަގުމަތިން ރެންޑަމް ސާމްޕަލް ހިލޭ ހެދޭ އިރު، ޕީސީއާރުގެ ނަތީޖާއެއް ކޮންމެހެން ބޭނުންވާ ފަރާތްތަކަށް ބޮޑުއަގު ދީފަ އެކަން ކުރަން ޖެހުމަށްވުރެ އެ އިންތިޒާމް ހަމަޖެހިފައި އޮތުން މާ ރަނގަޅުވާނެ ކަމަށް ފިރުޝާން ވިދާޅުވިއެވެ.

އެޗްޕީއޭއިން ބުނީ ރެއާއި މިރޭ، ސޯޝަލް ސެންޓަރުގެ ސާމްޕަލް ކަލެކްޝަން ސެންޓަރު 7:30 އިން 9:30 އަށް ހުޅުވާފައި ހުންނާނެ ކަމަށެވެ.

އިއްޔެ ކުއްލި ގޮތަކަށް އުސޫލަށް ގެނައި ބަދަލާއެކު ދެން ވެކްސިންގެ ދެ ޑޯޒު ފުރިހަމަކޮށްފައިވާ މީހުންނަށް ވެސް ދަތުރުކުރެވޭނީ 72 ގަޑިއިރު ނުވާ ޕީސީއާރު ނެގެޓިވް ނަތީޖާއަކާއެކުއެވެ. އަދި ވެކްސިންގެ ޑޯޒްތައް ފުރިހަމަނުވާ ފަރާތެއްނަމަ، 14 ދުވަހުގެ ފުރަބަންދު ކަރަންޓީނު ފުރިހަމަކުރުމަށްވެސް އެޗްޕީއޭއިން ވަނީ އަންގާފައެވެ.