އަތޮޅުތަކުގެ ރަށްރަށުން އޮމިކްރޮން ވޭރިއަންޓް ފެނިއްޖެއެވެ.

ހެލްތް ޕްރޮޓެކްޝަން އޭޖެންސީން މިހާރު ކުރިއަށްގެންދާ ނޫސްވެރިންގެ ބައްދަލުވުމުގައި ޑރ. ނަޒްލާ ރަފީޤް ވިދާޅުވީ އަތޮޅުތެރޭގެ ރަށްރަށުން އޮމިކްރޮން ވޭރިއަންޓް މިހާރު ފެނިފައިވާ ކަމަށާއި އޭގެތެރޭގައި ދިވެހިންވެސް ހިމެނޭ ކަމަށެވެ.

އޮމިކްރޮން ވޭރިއަންޓް ފެނުނު ރަށްރަށުގެ ތެރޭގައި މާލޭގެ އިތުރުން މާފުއްޓާއި، ކުޑަހުވަދޫ ހިމެނެއެވެ. ޑރ. ފާތިމަތު ނަޒްލާ ރަފީގު ވިދާޅުވީ، އޮމިކްރޯނަށް މި ހަފްތާގައި ހަތް ދިވެހިން ޕޮޒިޓިވް ވެފައިވާއިރު މިދިޔަ ހަފްތާގައި ވެސް ދިވެއްސަކު އެ ވޭރިއަންޓަށް ޕޮޒިޓިވް ވެފައިވާ ކަމަށެވެ.

މިހާތަނަށް އޮމިކްރޮން ވޭރިއަންޓް ޖެހިފައިވާ 8 ދިވެހިން ފާހަގަވެފައިވާ ކަމަށް ޑރ. ނަޒްލާ ވިދާޅުވިއެވެ. އޮމިކްރޯން ކޭސްތައް ފެނިފައިވަނީ ކުޑަހުވަދޫއިން އެއް ކޭސް މާފުށިން ތިން ކޭސް އަދި މާލެއިން ހަތަރު މީހުންނެވެ. މީގެ އިތުރުން ރާއްޖެއަށް ޒިޔާރަތް ކުރި 19 ފަތުރުވެރިއްގެ ގައިންވެސް މި ވޭރިއަންޓު ވަނީ ފެނިފައެވެ.

ޑރ. ނަޒްލާ މިއަދު ވިދާޅުވީ ޑެލްޓާގައި ކޭސްތައް ބޮޑަށް ފެނުނީ މާލެއިން ނަމަވެސް އޮމިކްރޯންގެ ކޭސްތައް ރާއްޖޭގެ އެކި ސަރަހައްދުތަކުން ފެންނާނެކަމަށް ބެލެވޭ ކަމަށެވެ. ޑރ. ނަޒްލާ ވިދާޅުވީ، އޮމިކްރޮން އުޅޭ ގައުމުތަކުގެ ތަޖުރިބާއިން 1 ދުވަހާއި 3 ދުވަސްތެރޭ ކޭސްތައް ޑަބަލްވާކަން ފާހަގަވެފައިވާ ކަމަށެވެ.

އެޗްޕީއޭއިން ރޭ އާންމުކުރި ތަފާސްހިސާބުތަކުން ދައްކާގޮތުން، 454 މީހުންނަށް ކޮވިޑު ޖެހިގެން ރިޕޯޓު ކޮށްފައި ވެއެވެ. އޭގެ ތެރޭގައި މާލޭން 192 މީހުންނަށް ކޮވިޑު ޖެހިފައިވާއިރު، ރަށްރަށުން 165 މީހުން އަދި ރިސޯޓުތަކުން 74 މީހުންނަށް ކޮވިޑު ޖެހިގެން ރިޕޯޓު ކޮށްފައި ވެއެވެ.