ކޯވިޑް-19ގެ ޙާލަތު ގޯސްވުމުން އެކަމުގެ ޖެއްސުން ރައްޔިތުންނަށް ނުކުރުމަށް އަދާލަތު ޕާޓީގެ އިލްމްވެރިންގެ މަޖިލީހުގެ ނާއިބް ރައީސް ޑރ. މުހައްމަދު އިޔާޒް ގޮވާލައްވައިފިއެވެ.

ޑރ. އިޔާޒް މިމޭރުމުން ގޮވާލެއްވީ ރާއްޖޭގައި ކޮވިޑު ވަރަށް ބޮޑަށް ކޮންޓްރޯލް ވެފައި އޮތުމަށްފަހު އަނެއްކާވެސް އަދަދުތައް އިތުރުވާން ފެށުމާ ގުޅިގެންނެވެ. ރާއްޖޭގެ ރަށްރަށުން ކޮވިޑުގެ އާ ވޭރިއަންޓް، އޮމިކްރޮން ފެނުމާއި ގުޅިގެން އެޗްޕީއޭއިން އެކަަމަށް ސަމާލުވުމަށް އިލްތިމާސް ކޮށްފައިވަނިކޮށް ގިނަ ބަޔަކު އެއްވެ އާ އަހަރު ފެށުން ފާހަަގަކުރުމާއި މާލޭގައި ކޮންމެ އަހަރަކު ބާއްވަމުން އަންނަ ނައިޓް މާކެޓްވެސް ވަނީ ބާއްވާފައެެވެ.

އެކަމާ ގުޅިގެން ޑރ. އިޔާޒް ވިދާޅުވީ ކޮވިޑް ކޭސްތައް އިތުރުވާނެކަން އެނގިތިބެ މީހުން އެއްކޮށްގެން އާއަހަރު ފާހަގަކުރުމަށް ޝޯ ބާއްވާފައިވާ ކަމަށާއި މިހާރު ޙާލަތު ގޯސްވުމުން ރައްޔިތުންނަށް ހުރިހާ ތަކުލީފެއް ޖެއްސުން ރަނގަޅު ނޫން ކަމަށެވެ.

"ޙާލަތު ގޯސްވީމަ އެކަމުގެ ޖެއްސުން ރައްޔިތުންނަށް ކުރުން ރަނގަޅެއް ނޫން." ޑރ. އިޔާޒް ވިދާޅުވެފައިވެއެވެ.

ކޮވިޑް ނަންބަރުތައް ކުއްލިއަކަށް އިތުރުވާން ފަށާފައިވަނީ މިދިޔަ ޑިސެމްބަރު މަހުގެ ކުރީކޮޅު ކޮވިޑުގެ އޮމިކްރޮން ވޭރިއަންޓު ރާއްޖޭން ފެނުނު ފަހުންނެވެ. އެޗްޕީއޭ އިން މިއަދު ބުނެފައިވަނީ އަތޮޅުތެރޭގެ ރަށްރަށުން އޮމިކްރޮން ވޭރިއަންޓް މިހާރު ފެނިފައިވާ ކަމަށާއި ބައްޔަށް 8 ދިވެއްސަކުވެސް ޕޮޒިޓިވްވެފައިވާ ކަމަށެވެ.

އޮމިކްރޮން ވޭރިއަންޓް ފެނުނު ރަށްރަށުގެ ތެރޭގައި މާލޭގެ އިތުރުން މާފުއްޓާއި، ކުޑަހުވަދޫ ހިމެނެއެވެ. އޮމިކްރޯން ކޭސްތައް ފެނިފައިވަނީ ކުޑަހުވަދޫއިން އެއް ކޭސް މާފުށިން ތިން ކޭސް އަދި މާލެއިން ހަތަރު މީހުންނެވެ. މީގެ އިތުރުން ރާއްޖެއަށް ޒިޔާރަތް ކުރި 19 ފަތުރުވެރިއްގެ ގައިންވެސް މި ވޭރިއަންޓު ވަނީ ފެނިފައެވެ.