ހުޅުމާލޭ ފޭސް ދޭއްގައި ޕްރީ ސްކޫލެއް އަޅައިދޭނެ ބަޔަކު ހޯދުމަށް ހައުސިންގ ޑިވެލޮޕްމެންޓް ކޯޕަރޭޝަން އެޗްޑީސީން އިއުލާނުކޮށްފިއެވެ.

އެޗްޑީސީން ކުރި އިއުލާނެއްގައި ބުނީ ހުޅުމާލޭގެ ފޭސް ދޭއްގައި ޕްރީ ސްކޫލެއް އަޅަން ކުރިމަތި ލެވޭނީ ހަމައެކަނި ދިވެހި ކުންފުނި ތަކަށް ކަމަށެވެ. މި މަސައްކަތަށް ބީލަން ހުށަހެޅުމުގެ ފުރުސަތު ވަނީ މި މަހުގެ 25 ވަނަ ދުވަހާއި ހަަމައަށް ހުޅުވާލާފައެވެ.

ހިޔާ މަޝްރޫޢުގެ 25 ބުރީގެ 16 ޓަވަރުގައި ދިރިއުޅޭ ފަރާތްތަކުގެ ޢަދަދު އިންތިހާއަށް އިތުރުވެފައިވީ ނަމަވެސް އެ ސަރަޙައްދަށް ބޭނުންވާ އަސާސީ ޚިދުމަތްތައް ފޯރުކޮށްދިނުމުގައި ސަރުކާރުން އިހުމާލުވެފައިވާ ކަމަށް ފްލެޓްތަކުގައި ދިރިއުޅޭ ރައްޔިތުން ދަނީ ބުނަމުންނެވެ.

ހުޅުމާލޭގައި މިހާރު ތިން ސްކޫލު ހުރެއެވެ. އެެއީ ޣާޒީ ސްކޫލާއި، ރެހެންދި ސްކޫލް އަދި ހުރަވީ ސްކޫލް އެވެ. ހުޅުމާލޭ ފޭސް 2 ގައި ޢިމާރާތް ކުރާ ފުރަތަމަ ސްކޫލު ކަމަށްވާ ޞަލާޙުއްދީން ސްކޫލް އިމާރާތް ކުރުމަށް މިދިޔަ އަހަރުގެ ފެބްރުއަރީ 7 ވަނަ ދުވަހު ވަނީ އަމީން ކޮންސްޓްރަކްޝަނާ ހަވާލުކޮށްފައެވެ. ހުޅުމާލޭ ދެވަނަ ފިޔަވަހީގައި 4 ސްކޫލު އެޅުމަށް މިހާތަނަށް ނިންމާފައިވާއިރު، އެޗްޑީސީން ބުނެފައިވަނީ ހުޅުމާޅޭ ދެވަނަ ފިޔަވަހީގައި ބޭރު ފަރާތަކުން ތަރައްޤީކުރާ އިންޓަރނޭޝަނަލް ސްކޫލެއްވެސް ހުންނާނެކަމަށެވެ.

ރައީސް ޔާމީންގެ ވެރިކަމުގައި ޢިމާރާތްކުރެއްވި ހިޔާ ފްލެޓްތަކަށް މި ސަރުކާރުން އިހުމާލުވަމުންދާ ކަމުގެ ޝަކުވާގެ އަޑުތައް ގަދަވެފައިވާއިރު ހިޔާފްލެޓްތަކުން ކުނި އުކާލުމާއި އެ ސަރަޙައްދުގެ ދަތުރުފަތުރުގެ ޚިދުމަތަށް އެކަށީގެންވާ ނިޒާމެއް މިއަދާހަމައަށްވެސް ޤާއިމްކުރެވިފައެއް ނުވެއެވެ. އެކަމާ ގުޅިގެން ހިޔާ ސަރަޙައްދުގައި ކުނި ޖަމާވެ ދޭތެރެދޭތެރެއިން ކުނިތަކުގައި ރޯވުމުގެ ޙާދިސާތައްވެސް ދަނީ ހިނގަމުންނެވެ.

މީގެ އިތުރުން ފްލެޓްތައް ހިމެނޭ ސަރަޙައްދުގެ ސަލާމަތީ ކަންތައްތައް ނުބެލެހެއްޓޭކަމުގެ ޝަކުވާގެ އަޑުވެސް ވަނީ ގަދަވެފައެވެ.